KIWANDA CHA SARUJI MBIONI KUJENGWA

Imetumwa : July 5th, 2023

Mkuu wa Mkoa wa Dodoma Mhe. Rosemary Senyamule leo Julai 5, 2023 amefanya kikao kwa njia ya mtandao na wawekezaji wakizawa ambao wameingia ubia na wawekezaji kutoka Libya kwa ajili ujenzi wa kiwanda cha saruji, kiwanda ambacho uwekezaji wake ni wa thamani ya Dola Milioni 200 na kinatarajiwa kujengwa Wilayani Kongwa.

Kikao hicho kwa njia ya mtandao kimefanyika katika ukumbi wa Ofisi ya Mkuu wa Mkoa kati ya kampuni ya Alotab & Block BB na Libyan Petrolium ya Libya hafla iliyoshuhudiwa na Wakuu wa Wilaya, Wakurugenzi wa Halmashauri na Wataalamu kutoka Jiji la Dodoma.

Kwa upande wake Mkuu wa Mkoa wa Dodoma Mhe. Rosemary Senyamule amewahakikishia wawekezaji hao mazingira rafiki ya kutekeleza shughuli zao za uwekezaji na kuwakaribisha kuwekeza zaidi katika ujenzi wa viwanda vingine, ujenzi wa Hoteli zenye hadhi ya nyota Tano na kuwekeza katika ujenzi wa miundombinu ya afya.

“Tunamshukuru sana Mhe. Dkt. Samia Suluhu Hassan kwa kufungua fursa za uwekezaji ndani na nje ya nchi. Nawakaribisha Dodoma, Makao Makuu ya Nchi yetu, fursa za uwekezaji ni nyingi wekezeni zaidi katika Mkoa wetu, tunayo ardhi na malighafi ya kutosha” Senyamule alisisitiza.

Mkuu wa Wilaya ya Kongwa Mhe. Remidius Mwema amesema Wilaya yake iko tayari kushirikiana na wawekezaji hao na kuainisha kuwa katika Wilaya yake ekari 500 zimepimwa katika eneo la Pandambili maalumu kwa ajili ya uwekezaji.

Nae mwekezaji mzawa Bw. Addulkadir Jilan akizungumza kwa niaba ya wenzake amesema kuwa ujenzi wa Kiwanda hicho utaanza mapema mwezi Septemba na kusisitiza kuwa maandalizi yote yanaendelea ikiwa ni pamoja na makubaliano na Kampuni ya Beijing kutoka China ambao watahusika na ujenzi wa Kiwanda hicho.