RAIS MAGUFULI: KUANZIA LEO DODOMA NI JIJI

Imetumwa : April 26th, 2018

RAIS MAGUFULI ATANGAZA KUIPA HADHI YA JIJI MANISPAA YA DODOMA

Rais wa Jamhuri ya Muungano wa Tanzania Dkt. John Pombe Magufuli leo Aprili 26, 2018 ametangaza kuipandisha hadhi Manispaa ya Dodoma kuwa Jiji la Dodoma na kumteua aliyekuwa Mkurugenzi wa Manispaa ya Dodoma Ndg. Godwin kunambi Kuwa Mkurugenzi wa Jiji la Dodoma.

Mheshimiwa Rais Magufuli ametangaza uamuzi huo wakati akitoa salamu zake kwenye Sherehe za Maadhimisho ya miaka 54 ya Muungano wa Tanganyika na Zanzibar zilizofanyika kwenye uwanja wa Jamhuri Mjini Dodoma Makao Makuu ya Nchi na kuagiza taratibu zote  za kisheria kuhusiana na suala hilo zifanyike.

“kuanzia leo, kwa mamlaka mliyonipa Watanzania natangaza Dodoma ni Jiji, Maandalizi yote ya Kisheria yaanze kufanyika na huyu Mkurugenzi aliyekuwa wa Manispaa ya Dodoma nimemteuwa kuwa Mkurugenzi wa Jiji la Dodoma” alitangaza Rais Magufuli

Amesema kuwa Dodoma itakuwa jiji la kipekee kwa kuwa lipo katikati ya Nchi na ameahidi kuzungumza na wadau mbalimbali wa maendeleo kwa ajili ya kupata miradi ya uendelezaji wa jiji la Dodoma na kuwa wadau hao sasa watambue fedha watakazotoa kwa ajili ya miradi ya Maendeleo Dodoma haziji kwenye Manispaa bali sasa zinakuja kwenye Jiji la Dodoma.

Rais Magufuli pia amesema azma ya serikali kuhmia Dodoma ipo palepale kamwe hakuna kurudi nyuma na hadi sasa tayari watumishi 3800 wameshahamia Dodoma. Amesema na yeyen kama alivyoahidi mwaka huu anahamia Dodoma.

Mkuu wa Mkoa wa Dodoma Dkt. Binilith Mahenge Kwa niaba ya Wananchi wote wa Mkoa wa Dodoma amemshukuru Mheshimiwa Rais Magufuli kwa heshima kubwa sana aliyoupatia Mkoa wa Dodoma kwa kuipandisha Manispaa ya Dodoma kuwa Jiji huku akisema zipo baadhi ya Manispaa hapa nchini zipo katika mchakato wa kuomba kupandishwa kuwa jiji na bado hazijafanikiwa.