TANZANIA YAANDIKA HISTORIA KWA KUMUWEKA MADARAKANI RAIS MWANAMKE KWA KURA ZA KISHINDO

Imetumwa : November 3rd, 2025

Hatimaye historia imeandikwa, kwa mara ya kwanza Rais mwanamke kupewa dhamana ya kuliongoza Taifa la Tanzania, zaidi ya Watanzania Milioni 31 walifanya maamuzi kwenye sanduku la kura, Oktoba 29, 2025 kwa kutumia haki zao za Kikatiba kumchagua Rais wa Jamhuri ya Muungano wa Tanzania atakayewaongoza kwa kipindi cha miaka mitano ijayo (2025 -2030), awamu ya sita, muhula wa pili. 

Rais, Mhe. Dkt. Samia Suluhu Hassan, aliapishwa Novemba 03, 2025 katika Uwanja wa Gwaride, Ikulu ya Chamwino, iliyopo Mkoa wa Dodoma. Baada ya kuapishwa na kuwa rasmi Rais na Amiri Jeshi Mkuu wa Jamhuri ya Muungano wa Tanzania.

Baada ya sherehe za Uapisho zilizofana kwa kuhudhuriwa na viongozi mbalimbali wa Mataifa ya Afrika sambamba na Waheshimiwa Mabalozi wanaoziwakilisha nchi zao hapa nchini, Mhe. Dkt. Samia Suluhu Hassan akapata nafasi ya kuzungumza na wananchi kupitia vyombo vya habari vilivyokua vikirusha matangazo hayo Mubashara na kusema haya;

“Watanzania, tuchague hekima badala ya ghadhabu, busara badala ya mihemko, upendo badala ya chuki, uvumilivu badala ya vinyongo, umoja badala mgawanyiko na amani badala ya vurugu. Lakini vilevile ni wajibu wetu kuchagua unyeyekevu badala ya kiburi na huruma badala ya hasira.”

Aidha, Amiri Jeshi Mkuu amezungumzia namna ambavyo Demokrasia haiwezi kupimwa kwa kushinda uchaguzi pekee bali ni jinsi ambavyo wananchi kwa kushirikiana na Serikali yao waliyoiweka madarakani watakavyoendesha mambo yao baada ya zoezi la uchaguzi kupita kwa maslahi mapana ya Taifa.

Uchaguzi Mkuu nchini Tanzania umefanyika Oktoba 29, 2025 ikiwa ni utaratibu wa kufanyika kila baada ya miaka mitano ambapo vyama 17 vilishiriki kuwania nafasi ya Rais, Wabunge na Madiwani ambao wataunda Serikali ya awamu ya Sita, Muhula wa pili.

#dodomafahariyawatanzania

#wekezadodomastawishadodoma

#keroyakowajibuwangu