Afisa Elimu Mkoa wa Dodoma Akagua Maendeleo ya Ujenzi na Maendeleo ya Wanafunzi wa Kidato Cha Tano Katika Shule Za Sekondari KIbaigwa na Bunge

Imetumwa : June 30th, 2022

Afisa Elimu Mkoa wa Dodoma Bw. Gift Kyando, leo ametembelea shule ya Sekondari ya Wasichana Kibaigwa iliyopo katika Wilaya ya Kongwa  na Shule ya sekondari ya Wasichana Bunge iliyopo eneo la Kikombo, Wilaya ya Chamwino  Mkoa wa Dodoma. Bw. Kyando amefanya ziara hiyo yenye lengo la kuangalia maendeleo ya ujenzi na maendeleo ya wanafunzi kidato cha 5 walipokelewa shuleni hapo.

Shule ya Wasichana Kibaigwa, imejengwa kwa fedha za Serikali, ambapo Serikali ilitoa kiasi cha Tsh.1 bln, ambazo zimetumika kujenga Madarasa 13, Mabweni 4, Bwalo la chakula, jengo la utawala, nyumba za walimu pamoja na Maabara 2 kwa ajili ya masomo ya Sayansi.

Akizungumza Mwalimu Mkuu wa Shule hiyo, Bi. Jema Kihwelu amemshukuru,Afisa Elimu Mkoa kwa Kutenga wakati na kutembelea shule hiyo ili  kuangalia maendeleo ya ujenzi wa shule pamoja na wanafunzi. Mwalimu Kihwelu ameahidi kushirikiana na walimu wenzake kufanya kazi kwa bidii  ili kuhakikisha shule yake hiyo inafanya vizuri katika matokeo yake ya Kidato cha Sita.

“Mimi ni Mama yenu, naahidi kuwalea, nitawapenda, kuwalinda na kuwasimamia katika masomo yenu na kuhakikisha munafanya vizuri katika mitihani yenu". Amesisitiza Mwl.Kihwelu.

Nae Afisa elimu Mkoa, Bw. Kyando  amewasaa wanafunzi  hao  kusoma kwa bidii.Nikiwa Afisa Elimu Mkoa Jukumu langu kubwa  ni kuhakikisha wanafunzi wote wa Mkoa wa Dodoma wanapata fursa ya kusoma shule na katika mazingira rafiki.

"Sisi wazazi wenu tumewaleta hapa musome na si vinginevyo, hivyo mi muhimu musome kwa bidii ili muje  kufaulu vizuri, na hatimae kutupatia sifa sisi wazazi wenu.Hivyo hakikisheni kila munapoamka,  mnapokula, mnapocheza na mpolala, akili yenu iwe inafikiria masomo tu. Ni vyema kila mmoja wenu ajiulize nitapelekea zawadi gani kwa wazazi wangu endapo nitafeli? Serikali inajitahidi sana kuwaletea huduma zote zinazohitajika na kuwajengea mazingira rafiki kwa masomo, ili kazi ya kusoma tu ibaki kwenu, hivyo hakikisheni kitabu kinakua kipaumbele kila mnapoamka mpaka mnapolala". Amesisitiza Bw. Kyando.

Shule ya Sekondari ya Wasichana Kibaigwa ni miongoni mwa shule 30 za kidato cha Tano na Sita zilizopo katika Mkoa wa Dodoma na inatarajiwa kupokea wanafunzi 204, mpaka Sasa jumla ya wanafunzi waliowasili shuleni hapo ni 147 tu. Shule hiyo inafundisha michepuo ya CBG, HGE, EGM na HGK huku ikiwa na walimu 13 ambapo kwa Sasa wapo waalimu 8 wakati walimu wengine watano watawasili  siku chache zijazo.

Aidha baada ya ziara hiyo, Afisa Elimu amtembelea Shule ya sekondari ya Wasichana Bunge iliyopo eneo la Kikombo, Wilaya ya Chamwino kujionea maendeleo yake na pia kuongea na wanafunzi ambapo pia amewaasa wanafunzi hao kusoma kwa bidii ili waweze kutimiza malengo yao nakurudisha zawadi nono Kwa wazazi na walezi wao.

MWISHO