DODOMA KUFIKIA ASILIMIA 95 YA UFAULU MWISHONI MWA 2025

Imetumwa : December 17th, 2024

Na. Hellen M. Minja,

       Habari – DODOMA RS

Wakuu wa shule za msingi na sekondari Mkoa wa Dodoma, wametakiwa kutekeleza kikamilifu mpango Mkakati wa elimu kwa kuhakikisha kuwa kufikia mwisho wa mwaka 2025, mkoa unafikia ufaulu wa asilimia 95 kulingana na malengo yaliyowekwa katika mkakati huo

Hayo yamebainishwa na Mkuu wa Mkoa wa Dodoma Mhe. Rosemary Senyamule alipokua akitoa maelekezo wakati wa kikao kazi cha Maafisa elimu Kata, wakuu wa shule na walimu wakuu kilichofanyika katika ukumbi wa Maria De Matias Jijini Dodoma leo Disemba 17, 2024.

Mkuu wa Mkoa, ametoa maelekezo kadhaa ikiwemo kuzingatia utekelezaji wa mpango Mkakati wa elimu kwa miaka mitatu, unaolenga kuinua ufaulu kwa mkoa wa Dodoma.

“Kila Mkuu wa shule, hakikisha unatekeleza mpango Mkakati kikamilifu ili kufikia mwisho wa 2025, Mkoa uwe na ufaulu bora kulingana na malengo tuliyojiwekea katika Mkakati na hapa tumejiwekea malengo ya kufikia 95% ya ufaulu” Mhe. Senyamule

Aidha, Mhe. Senyamule ameagiza upandaji miti katika kila shule hasa miti ya matunda kwani licha ya kivuli, pia itasaidia kupata lishe kwa wanafunzi pamoja na kuongeza kipato kwa shule husika kutokana na kufanya biashara ya matunda.

“Wakuu wa shule za msingi hakikisheni zoezi la upandaji miti linasimamiwa kikamilifu na kila shule ipande miti isiyopungua 500 na kuitunza. Pandeni miti ya matunda kwani ni chakula kwa watoto na itakua ni mradi wa shule kwani mukiamua kuuza matunda mutanunua chakula na itakua ni motisha kwa mapato ya shule.” Mhe. Senyamule

Vilevile, Katibu Tawala Mkoa wa Dodoma Bw. Kaspar Mmuya, amezungumzia suala la motisha kwa walimu kutoka kwa viongozi wao kuwa ni jambo muhimu; “Tuwaone tunaowasimamia kwenye elimu katika eneo lolote kuwa ni wa thamani kwenye nafasi yako ya uongozi, muwapende, muwathamini na muwasikilize”.

Kikao kazi hiki ni muendelezo wa vikao kadhaa vya maafisa elimu, wakuu wa shule na walimu wakuu vyenye lengo la kuboresha na kuhakikisha matokeo bora ya utekelezaji wa Mkakati wa elimu wa miaka mitatu unaosema “Uwajibikaji wangu, ni msingi wa kuinua ubora wa elimu na ufaulu Dodoma” ambayo pia ndio kauli mbiu ya vikao hivyo.

#dodomafahariyawatanzania                                  #keroyakowajibuwangu #mtiwangubirthdayyangu