DODOMA YADHAMIRIA KUFANYA MABADILIKO KWENYE KILIMO

Imetumwa : February 2nd, 2023

DODOMA YADHAMIRIA KUFANYA MABADILIKO KWENYE KILIMO

Maafisa ugani Mkoa wa Dodoma wametakiwa kutumia ujuzi na utaalamu wao walioupata kuhakikisha sekta ya kilimo inainuka na kufanya mabadiliko makubwa kwenye Mkoa. Hayo yamebainishwa wakati wa kikao kazi kilichoitishwa na Mkuu wa Mkoa wa Dodoma Mhe Rosemary Senyamule alipokuwa akiongea na maafisa ugani kutoka Halmashauri zote nane za Mkoa wa Dodoma kwenye ukumbi wa shule ya Maria de Mathias eneo la Kisasa Jijini Dodoma. Mhe. Senyamule

amewaambia Maafisa ugani hao kuwa Mkoa umedhamiria kufanya Mapinduzi makubwa kwenye Kilimo kutokana na Serikali ya Awamu ya Sita kuonyesha dhamira kwenye sekta hiyo."Dodoma tunataka kufanya mapinduzi makubwa kwenye Kilimo na Rais wetu ameshaanzisha hilo kwa kutujengea mabwawa ya umwagiliaji katika Wilaya za Chamwino na Mpwapwa. Matarajio ya Serikali ni Tanzania kuwa kitovu cha kilimo Afrika" Amesema Mh. Senyamule Ameongeza

kuwa lengo la Mkoa ni kilimo kuwa na tija kwa kuwa wataalamu wa kutosha wapo."Tunataka kilimo cha Mkoa wa Dodoma kiwe na tija kwa Mkoa na nchi kwa ujumla. Haihitaji mabilioni kufanya mabadiliko, kila Afisa ugani awe na shamba darasa lake kwani ni wajibu wenu kuwaelekeza wananchi hatua za kilimo bora kwa mifano hai kutoka kwenye mashamba yenu" Mhe. Senyamule.

Kadhalika, Katibu Tawala Mkoa wa Dodoma Dkt. Fatuma Mganga, amesisitiza kuwa suala la umaskinj kwenye Mkoa wa Dodoma linatokana na Kilimo kutopewa kipaumbele."Suala la kilimo halijapewa uzito wa kutosha, tunayo ardhi ya kutosha, ni muhimu tufanye mabadiliko na mageuzi ya kimkakati ili tuondokane na umasikini. Kilimo hakipewi msisitizo kama elimu, asiyelima hachukuliwi hatua yeyote. Bila kufufua kilimo, hatuwezi kufufua elimu, afya na sekta nyingine kwani kilimo ndio Mama anayetegemewa kuendeleza sekta nyingine. Hatuwezi kuondoa umaskini bila kufanya mageuzi kwenye Kilimo" Amesisitiza Dkt. Mganga

Akiwasilisha taarifa ya sekta ya kilimo kwenye mkutano huo, Afisa Kilimo Mkoa Bw. Abraham Benard amesisitiza matumizi ya mbolea kwenye Kilimo kwa kutoa takwimu juu ya wakulima wanaotumia mbolea kuwa, hadi kufikia Januari 30, 2023 jumla ya wakulima 2,221 walifanikiwa kununua mbolea ya ruzuku kati ya wakulima 107,994 walioandikishwa na wenye sifa ya kununua sawa na asilimia 2.1

Kikao hicho pia kimeweka maazimio kadhaa kwa lengo la kuinua sekta hiyo kwa mwaka huu ikiwa ni pamoja na; kila Kaya kulima ekari moja ya alizeti, 1 ya mtama na 1 ya zao jingine ili kupata soko la kutosha, Maafisa ugani kuwa na malengo na kuyatekeleza, matumizi ya TEHAMA kwa maafisa ugani kufikisha taarifa kwa wakati, kuwepo kwa mpango kazi wa Mkoa kwa maafisa ugani wote na Kuazimia maafisa ugani wote kuwa wabunifu na kuwa na dhamira ya dhati katika kusuma mbele agenda ya kilimo nchini. MWISHO