ENDELEENI KUELIMISHA VIJANA JUU YA MAADILI MEMA

Imetumwa : September 14th, 2022

Mkuu wa Mkoa wa Dodoma Mhe. Rosemary Staki Senyamule, amewapongeza Watawa wa Shirika la Mtakatifu Gemma Galgani lililopo Wilaya ya Kondoa kwa dhamira yao ya kuanzisha kituo cha malezi kwa Watoto ambao wazazi wao wamehukumiwa vifungo gerezani huku akisisitiza Taasisi nyingine za dini kuiga mfano huo.

Hayo yamebainika katika sherehe za maadhimisho ya Jubilei ya Shirika hilo la Watawa ambalo limetimiza miaka 75 tangu kuanzishwa kwake ambapo Mhe. Mkuu wa Mkoa  amemwakilisha Makamu wa Rais Mhe. Phillip Isdori Mpango ambaye ndiye aliyekuwa mgeni rasmi.

“Mpango wa kuanzisha kituo cha kulea Watoto wa wazazi walio gerezani ni kitendo kikubwa na cha muhimu sana, hivyo, nitoe wito kwa jamii kuendelea kushirikiana na Taasisi za dini na Serikali kwa ujumla kusaidia walio katika mazingira magumu. Tuendelee kuwaelimisha vijana masuala maadili, tuwaombee vijana na viongozi wetu wote”. Mhe. Senyamule

Aidha, Mhe. Senyamule ametoa shukrani zake kwa viongozi wa dini kwa kuhamasisha suala la Sensa, zoezi lililofanyika nchi nzima na limetamatika siku kadhaa zilizopita. Pia ameelezea dhamira ya Rais wa awamu ya Sita kutaka kuifanya Tanzania kuwa nchi inayopenda haki, amani na uhuru kwani ameuongezea nguvu muhimili wa Mahakama kwa kuujengea makao makuu Jijini Dodoma.

“Zoezi la Sensa ya watu na makazi limekua na mafanikio makubwa na hii ni kutokana na ninyi viongozi wa dini mumekuwa mukishirikiana na Serikali katika kuhamasisha wananchi, niwapongeze sana kwa kuleta ufanisi huo mkubwa” Amesema Mhe. Mkuu wa Mkoa

Kwa upande wake Askofu  wa jimbo la Dodoma Beatus Kinyaiya, ametoa wito kwa Watawa hao kuendelea kuwa, na mshikamano.

“Umoja na mshikamano ni muhimu tumeendelea kuwa wamoja kusaidia watu” Askofu Kinyaiya

Mpaka sasa jumla ya Watawa 308 wameshahudumu katika shirika hilo tangu kuanziswa kwake mwaka 1947.

MWISHO