JAMII INA KIU YA KUPATA ELIMU YA MASUALA YA LISHE-RC SENYAMULE

Imetumwa : March 10th, 2025

Na. Hellen M. Minja,

       Habari – DODOMA RS

Wataalam wa lishe wametakiwa kuongeza nguvu katika utoaji elimu kwa jamii juu ya masuala ya lishe kwa kuwa jamii ina 'kiu' kubwa ya kupata elimu zaidi. Hayo yamebainishwa na Mkuu wa Mkoa wa Dodoma Mhe. Rosemary Senyamule alipohudhuria Mkutano wa mwaka wa Taasisi ya Tanzania Home Economics Association (TAHEA) inayojishughulisha na masuala kuimarisha Lishe katika jamii.

Mkutano huo wa siku mbili unafanyika kwenye Ukumbi wa Halmashauri ya Jiji la Dodoma Machi 10 - 11, 2025 ukijadili mambo mbalimbali yanayohusu lishe sambamba na maandalizi ya Maadhimisho ya miaka 45 ya TAHEA.

“Maafisa lishe tunayo kazi kubwa ya kufanya kwani bado jamii yetu inahitataji elimu kubwa ya lishe. Mimi nimeshuhudia kiu kubwa ya Watanzania sasa hivi ni kupata elimu ya lishe. Sisi Maafisa lishe tuongeze nguvu kwenye suala la lishe kwani ni fursa ya kiuchumi na tuoneshe kama tuna uwezo” RC Senyamule.

Aidha Mhe. Senyamule amempongeza Mhe. Rais kwa kuweka uzito wa kipekee kwenye suala la lishe kwani yeye ndiye Rais wa kwanza ambaye aliona ili lishe iende na ifike juu, lazima awapatie watu majukumu ikiwemo Wakuu wa Mikoa ambao, alisaini nao mikataba ya kuhakikisha kila mtu anachukua jukumu mahsusi la kumarisha lishe.

Akizungumza kwa njia ya simu wakati wa kikao hicho, Rais wa TAHEA Bi. Asia K. Kapande, amesema uwepo wa Mhe. Senyamule katika Mkoa huu inatoa motisha kwao na kuweka alama kwamba Serikali inatambua mchango wa TAHEA kwenye masuala ya kuimarisha Lishe na wanaamini Mkuu wa Mkoa huyo atawashika mkono katika jitihada zao.

Kadhalika, Mkurugenzi wa TAHEA Bi. Lediana Mng'ong'o, amesema Mhe. Rais Dkt. Samia Suluhu Hassan, ameitendea haki taaluma ya Lishe kwa sababu Lishe ilikua sio taaluma ya muhimu tena, lakini kupitia yeye, ameirudisha kwenye hadhi yake kwani hata idadi ya Maafisa Lishe walioajiriwa Serikalini imeongezeka kwa upana wake.

#dodomafahariyawatanzania

#keroyakowajibuwangu

#mtiwangubirthdayyangu