KAMPUNI YA GREEN DALE KUWEKEZA DODOMA

Imetumwa : September 13th, 2022

Uongozi wa Kampuni ya Green Dale inayojishughulisha na usindikaji wa Mafuta ya kupikia, hivi karibuni umemtembelea Mkuu wa Mkoa wa Dodoma Mhe. Rosemary Senyamule kwenye ofisi yake iliyopo Jengo la Mkapa House lengo likiwa kujitambulisha pamoja na kumuelezea dhamira yao kwa Mkoa wa Dodoma.

Viongozi hao wamemueleza Mkuu wa Mkoa kuwa dhamira yao kubwa ni kupata ardhi ya uwekezaji kwenye Kilimo cha Alizeti na Ufuta pamoja na kupata eneo lenye ukubwa wa Heka 2 mpaka 5 kwa ajili ya uwekezaji wa kiwanda cha uzalishaji wa Mafuta ya kupikia ya Alizeti. Endapo tutapata eneo hilo la kiwanda matarajio yetu ni  kuzalisha tani 20 za Mafuta kwa siku.

Mhe. Senyamule ameupongeza uongozi wa Kampuni hiyo kwa kuja na wazo kama hilo kwa Mkoa wa Dodoma kwani ndio Mkoa kinara kwa kilimo cha Alizeti na kuongeza kuwa lengo la Serikali ya Mkoa ni kuitangaza Dodoma na kuifanya ya viwanda kupitia kilimo.

“Mmekuja wakati sahihi sana kwani kwa sasa bado ardhi ya uwekezaji ipo na tunaalika wawekezaji wengine wengi kuja kuwekeza Dodoma kwani Mkoa ndio unakua.” RC Senyamule.

Kampuni  ya Green Dale inaundwa na vijana wa Diaspora kutoka nchini Marekani ambao ni mchanganyiko wa vijana kutoka nchini Ethiopia na Tanzania walioungana na kuanzisha kampuni hiyo  ya uzalishaji wa Mafuta ya kupikia aina ya Alizeti na Ufuta. Aidha baada ya kikao hicho  wawekezaji wao  walielekea Nala kuonyeshwa eneo ambalo linaweza kufaa kwa ajili ya uwekezaji wa Kiwanda cha hicho.

MWISHO