KITABU CHA PATO LA MKOA WA DODOMA CHA ZINDULIWA RASMI

Imetumwa : November 5th, 2024

Na. Sizah Kangalawe Habari - Dodoma Rs

Kitabu cha pato la mkoa na wasifu wa kiuchumi na kijamii wa Mkoa wa Dodoma kinachoelezea Pato la Mwananchi mmoja mmoja, Wilaya na Mkoa kimezinduliwa leo Novemba 5/2024 Jijini Dodoma.

Uzinduzi huo umefanywa na Naibu Waziri wa Nchi Ofisi ya Rais Mipango na Uwekezaji Mhe. Stanslaus Nyongo katika ukumbi wa mikutano wa Ofisi ya Mkuu wa Mkoa Jijini Dodoma.

Akizungumza na washiriki wa uzinduzi huo Mhe. Nyongo ametoa maelekezo kwa Mamlaka na Taasisi kutumia taarifa hizo  kupanga Mipango yao ya kimaendeleo.

"Napenda kutoa maelekezo kwa mamlaka za Serikali zilizopo Dodoma zitumie taarifa hizi katika kupanga mipango na programu zao za maendeleo kwa ajili ya kuundeleza Mkoa.

Aidha ametoa rai kwa Mkoa kuweka mikakati ya kuongeza tija kwenye kilimo " katika ripoti hii imeonesha kuwa sekta ya kilimo imechangia 40% kwenye pato la Mkoa, Mkoa uweke mikakati ili kuongeza uzalishaji na tija katika mazao ya chakula na biashara", Ameagiza Mhe. Nyongo

Kwa upande wake Mkuu wa Mkoa wa Dodoma Mhe. Rosemary Senyamule Amesema miongoni mwa dhamira ya kuandaa kitabu hicho ni kuweka mkazo katika sekta zinazolegalega.

" Faida za kuandaa pato la Mkoa ni pamoja na kutambua maeneo na sekta ambazo zinalegalega katika kukuza uchumi wa Mkoa ili kuongeza nguvu kwenye maeneo hayo, kutoa msingi thabiti zaidi wa kufanya maamuzi ya kiuchumi kwa Mkoa, Wilaya na Sekta Binafsi," Amesema Mhe. Senyamule.

Naye Mtakwimu Mkuu wa Serikali Dkt. Albina Chuwa ameupongeza Mkoa wa Dodoma kwa kuandaa kitabu hicho na kuiomba wizara ya Ofisi ya Rais Mipango na Uwekezaji, kuendelea kutenga fedha ili kuwezesha kukusanya taarifa za pato la Watanzania ambalo kupitia taarifa hizo zitaiwezesha Serikali kutambua vipaumbele vya Wananchi wa eneo husika kutokana na vipato vyao.

Hatahivyo katibu tawala Mkoa wa Dodoma Bw. Kaspar Mmuya Amesema taarifa zilizotumika kuandaa kitabu hicho zimezingatia weledi na vigezo  vinavyotakiwa huku zikiwa na vyanzo kutoka sekta mbalimbali ikiwemo kilimo na biashara.

#dodomafahariyawatanzania

#uzinduzipatolamkoa

#dodomatotheworld