KONDOA MJI YATOA SHILINGI MILIONI 193 MIKOPO YA ASILIMIA 10

Imetumwa : November 13th, 2024

Na. Hellen M. Minja,

       Habari – DODOMA RS

Halmashauri ya Kondoa Mji katika Wilaya ya Kondoa, Mkoa wa Dodoma, imetoa jumla ya shilingi milioni 193 ikiwa ni mikopo ya asilimia 10 kwa vikundi vya wanawake, vijana na watu wenye ulemavu kwa mwaka wa fedha 2024/2025.

Hafla ya utoaji wa mikopo hiyo imefanyika Novemba 13, 2024 katika Kata ya Bicha na kuhudhuriwa na Mkuu wa Mkoa wa Dodoma Mhe. Rosemary Senyamule alipofanya ziara katika Wilaya hiyo ambapo kikundi cha vijana Bicha, kimenunua pikipiki tano kwa wana kikundi.

“Kwa kutekeleza maelekezo ya Mhe Rais wetu ya kutoa 10% kwa makundi maalumu, Halmashauri ya Kondoa ndio ya kwanza kutoa mikopo hii. Nisisitize, kabla ya mwezi huu haujaisha, lazima wawe wametoa hela hizo. Nyinyi muliopata mikopo msifikiri ni jambo dogo”. Amesema Mhe. Senyamule

Awali, kabla ya kumkaribisha Mhe. Senyamule, Mkuu wa Wilaya ya Kondoa Mhe. Fatma Nyangasa, amesema mikopo hiyo imetolewa kwa awamu ya kwanza lakini bado itatolewa zaidi.

“ Kwa awamu ya kwanza Halmashauri yetu ya Kondoa Mji imetoa shilingi Milioni 193 kwa ajili ya vikundi hivi vya Vijana, Wanawake na Watu wenye Ulemavu. Tayari wamekwisha pokea, lakini kuna zaidi ya shilingi Milioni 100 nyingine ambayo ipo tayari kwa ajili ya kulipa vikundi vingine vinavyoendelea.” Mhe. Nyangasa

Licha ya kuhudhuria hafla hiyo, Mkuu wa Mkoa wa Dodoma pia alitembelea na kukagua ujenzi wa madarasa 4 kwa gharama ya shilingi 92,000,000 na matundu 8 ya vyoo (14,400,000) katika shule ya Sekondari Dilai ambao upo kwenye hatua ya umaliziaji.

Miradi mingine iliyo kaguliwa ni shule mpya ya Mafunzo ya Amali Kingale unaogharimu shilingi 544,225,626 pamoja na ujenzi wa madarasa mawili na mabweni mawili kwa ajili ya wanafunzi wa kidato cha tano (2025/2026) katika shule ya Sekondari Bukulu unaotekelezwa kupitia programu ya SEQUIP kwa shilingi 296,000,000.

#kurayakosautiyako              

#ujanjanikupigakura              

#dodomatukotayarikupigakura

#mtiwangubirthdayyangu