KONGWA YAJIVUNIA KITUO CHA UMAHIRI CHA MAZAO - MTANANA

Imetumwa : March 10th, 2023

Wilaya ya Kongwa ni miongoni mwa Wilaya saba zinazounda Mkoa wa Dodoma inayojivunia mafanikio kadha wa kadha yaliyopatikana katika sekta mbalimbali ndani ya kipindi cha miaka miwili tangu kuingia madarakani kwa Serikali ya awamu ya sita chini ya Rais Mhe. Dkt. Samia Suluhu Hassan. Mafanikio ya Wilaya hiyo yameelezwa wakati wa kipindi mubashara cha kutangaza mafanikio ya Mkoa wa Dodoma kwa Taasisi za umma kilichorushwa mwishoni mwa wiki.

Mkuu wa Mkoa wa Dodoma Mhe. Rosemary Senyamule, amesema kwa Wilaya ya Kongwa, Serikali imefanikiwa kutoa fedha za ujenzi wa kituo Mahiri cha mafunzo kwa wakulima katika eneo la Mtanana

“Wana Dodoma wana furaha sana na kuishukuru Serikali kwa utekelezaji wa Mradi wa ujenzi wa Kituo Mahiri cha Mafunzo kwa wakulima na usimamizi wa Mazao baada ya mavuno Mtanana – Kongwa. Hiki ni kituo cha kipekee na cha mfano kwa Afrika Mashariki, kitakuwa na utaalamu wa kuzuia sumu kuvu kwenye mazao na kitawezesha mazao yetu kuuzika kimataifa. Mradi huu upo chini ya Wizara ya Kilimo na unagharimu takribani kiasi cha shilingi Bilioni 19 huku ujenzi wake ukitarajiwa kukamilika Oktoba 2023. Mradi huu ni wa kimkakati ambao utasaidia usimamizi endelevu wa mazao” Amesema Mhe. Senyamule

Aidha, Mradi huu unatarajiwa kuwanufaisha wakazi wa Dodoma kwani utasaidia upatikanaji wa ajira kwa wananchi na kwa namna ya kipekee mradi huu unaifaharisha na kuistawisha Dodoma kwa namna yake.

Kama ilivyo ada, Mkurugenzi Mtendaji wa Wilaya ya Kongwa Dkt. Omary Nkullo, amedadavua kwa undani mafanikio katika sekta ya nishati ambapo amesema kuwa;

“Vijiji vilivyounganishwa na huduma ya umeme vimeongezeka kutoka Vijiji 63 mwaka 2021 hadi kufikia Vijiji 83 mwaka 2022 sawa na ongezeko la asilimia 95 ya vijiji vyote vya Wilaya. Wilaya inaendelea na utekelezaji wa mradi wa REA awamu ya III, mzunguko wa pili kwa thamani ya shilingi Bilioni 39 katika vijiji vya Makutupa, Silale, Suwi, Vilundilo, Lobilo, Silwa na Saigoni.

Hata hivyo, kupitia mradi wa Peri Urban unaotekelezwa na Mkandarasi Ceylex Engineering Co. Ltd kwa thamani ya shilingi Bilioni 17.3, Vitongoji sita katika Mamlaka ya Mji mdogo wa Kibaigwa, eneo moja Kijiji cha Mbande na Vitongoji Viwili katika Kijiji cha Laikala, vimepata huduma ya umeme. Ukarabati wa miundombinu mbalimbali ya umeme ikiwa ni pamoja na uwekaji wa nguzo za zege katika maeneo korofi na mengine yaliyopewa kipaombele. Jumla ya shilingi Milioni 617,249,594.35 zimetengwa kwa ajili ya utekelezaji na utekelezaji huo unaendelea” Amefafanua Dkt. Nkullo

Mkurugenzi huyo pia amegusia mafanikio yaliyopatikana kwenye sekta ya miundombinu ambapo amesema kuwa Wilaya ina mtandao wa barabara wenye jumla ya Km 1213.45. Barabara za Wilaya zinapitika kwa wastani wa 55% katika kipindi chote cha mwaka. Kiwango cha 35% zinapitika kwa shida kipindi cha mvua na 10% hazipitiki kabisa. Barabara za changarawe zimeongezeka kwa 24.34%, barabara za udongo zimepungua kwa 16.79% huku ujenzi wa barabara kwa kiwango cha lami zikiongezeka kutoka Km 3.7 hadi kufikia Km 8.7 Barabara hizi zimesaidia kukua kwa Mamlaka za Miji midogo ya Kongwa na Kibaigwa na kuongezeka kwa shughuli za kibiashara katika mitaa.

MWISHO