MGUSO WA KIPEKEE WA MHE.RAIS SEKTA YA AFYA,WAVUTA WADAU KITUPO CHA AFYA MKONZE

Imetumwa : March 11th, 2025

Na. Hellen M. Minja,

       Habari - DODOMA RS

Rais wa Jamhuri ya Muungano wa Tanzania Mhe. Dkt. Samia Suluhu Hassan, ametajwa kuwa na mguso wa kipekee kwenye sekta ya Afya kwa kufanikisha huduma bora sambamba na uwepo wa vifaa tiba kwenye vituo vingi vya afya hapa Nchini, hali inayovutia wadau zikiwemo Taasisi Binafsi kuchangia upatikanaji wa huduma hiyo adhimu.

Hayo yameelezwa na Mkuu wa Mkoa wa Dodoma Mhe. Rosemary Senyamule Machi 11, 2025, alipoalikwa katika hafla fupi ya kukabidhi vifaa na vifaa tiba vyenye thamani ya shilingi Milioni tisa kutoka Benki ya Stanbic Mkoni hapa katika Kituo cha Afya cha Kata ya Mkonze Jijini Dodoma.

Akizungumza na Watumishi wa kituo hicho pamoja na wakazi wa eneo hilo ambao ndio wanufaika wa huduma zinazotolewa na kituo hicho, Mhe. Senyamule amesema;

"Ndugu zangu haya mambo sio madogo ni makubwa na tunayasema kwa sababu ni mapinduzi yaliyotokea katika kipindi kifupi kwa sababu ya dhamira ya dhati ya Kiongozi wetu Mkuu na mguso wake wa pekee kwa maendeleo ya wananchi wake lakini leo kwa maendeleo ya sekta ya Afya.

"Stanbic Benki wameona Mhe. Rais ameweka hapa chumba cha kujifungulia, Madaktari wa upasuaji na mashine za X- Ray. Wagonjwa wameongezeka, baadhi ya vifaa vimekua vichache kutokana na ongezeko hilo wakasema hapana, sisi kama Benki, Mhe. Rais ameshafanya vingi, tuchukue sehemu yetu tukaongeze nguvu kwenye kazi ya Mhe. Rais." RC Senyamule.

Aidha, Meneja wa  Benki ya Stanbic Dodoma Bi. Joan Mbise, ameainisha vifaa na vifaa tiba hivyo ambavyo ni mashuka, vyandarua, pazia za kutenganishia vitanda, vifaa vya upasuaji na miche 150 ya miti ya matunda akisema kuwa, huo ni ushahidi wa dhamira yao ya dhati kuendelea kusaidia maendeleo ya Jamii pamoja na utunzaji wa mazingira.

Vilevile, Mganga Mfawidhi wa Kituo hicho cha Afya Halima Kheri, ametaja huduma zinazotolewa na kituo chake  kuwa ni huduma za Baba, Mama na Mtoto, upasuaji wa dharura, wagonjwa wa nje na ndani, kujifungua, meno, maabara, dawa, tiba na matunzo kwa wanaoishi na Virusi vya Ukimwi na Kifua Kikuu, mionzi na pia wameanzisha huduma ya kuhifadhi maiti.

Kituo cha Afya Mkonze ni miongoni mwa vituo 7 vya Halmashauri ya Jiji la Dodoma,kilianzishwa mwaka 1993. Kinahudumia wakazi 41256, Kaya 11006, mitaa 8 na Zahanati 9 zilizopo katika Tarafa ya Zuzu. Kituo kina Watumishi 59 wa Kada mbalimbali na kimehudumia wagonjwa 207,600 kwa mwaka 2024 ambao ni wastani wa wagonjwa 565 kwa siku.

 #dodomafahariyawatanzania

#keroyakowajibuwangu

#mtiwangubirthdayyangu