PAROLE DODOMA YATAKIWA KUJENGA UTARATIBU WA KUTEMBELEA WAFUNGWA

Imetumwa : September 17th, 2024

Bodi inayohusika na utaratibu wa kuwaachilia wafungwa gerezani ambao muda wao haujamalizika kwa kuzingatia sifa zinazotakiwa kisheria kwa Mkoa wa Dodoma (PAROLE), imetakiwa kuhakikisha inajenga utamaduni wa kuwatembelea wafungwa walioko gerezani mara kwa mara ili kuwasikiliza na kubaini changamoto zinazowakabili kwa ajili ya kuzipatia ufumbuzi.

 Hayo yamebainishwa leo Septemba 17, 2024 na Mkuu wa Mkoa wa Dodoma Mhe. Rosemary S. Senyamule wakati wa uzinduzi wa Bodi mpya ya nane ya PAROLE Mkoani humo uliofanyika kwenye ofisi za Makao Makuu ya Polisi Magereza zilizopo mkabala na Nyerere square Jijini Dodoma.

 Mkuu wa Mkoa ameihimiza Bodi hiyo kufanya kazi kwa weledi ili kukuza na kuendeleza tunu kuu za taifa. “Ni matumaini yangu Bodi hii mpya mnao anza mtafanya kazi kwa weledi mkubwa ili lengo la serikali lifikiwe na kuendelea kufaharisha Mkoa wa Dodoma “ Amesisitiza Mhe. Senyamule

 Kwa Upande wake, Katibu wa Bodi ya PAROLE na Mkuu wa Magereza Mkoa wa Dodoma ACP. George Wambura, amesema bodi hiyo imepata mafanikio kadhaa tangu kuanzishwa kwake mwaka 2003 ikiwa ni pamoja na kupunguza msongamano wa wafungwa gerezani, wafungwa wanaobaki gerezani kubadilisha tabia zao ili nao waweze kunufaika na parole, umeipunguzia serikali gharama za kuwahudumia pamoja na kusadia familia zilizopo katika hatari ya kusambaratika kutokana na wazazi/walezi kuwa gerezani na hivyo kupunguza wimbi la watoto wa mtaani.

 Aidha Bodi hiyo inahusisha jumla ya wajumbe kumi na moja na itahudumu katika kipindi cha miaka mitatu.

 #dodomafahariyawatanzania #keroyakowajibuwangu