RAIS SAMIA ATOA SULUHU MGOGORO WA ARDHI KINGALE - KONDOA

Imetumwa : February 4th, 2023

Rais wa Jamhuri ya Muungano wa Tanzania Mhe Dkt. Samia Suluhu Hassan, ametoa Suluhu kwenye mgogoro wa ardhi uliodumu kwa zaidi ya Miongo mitatu dhidi ya eneo lenye ukubwa wa ekari 7,495.74 lililopo kati ya Vijiji vya Kata ya Kingale katika Halmashauri ya Wilaya ya Kondoa na Gereza la King'ang'a ambalo ni eneo lenye rutuba kwa shughuli za kijamii za uzalishaji.

Suluhu hiyo imewasilishwa na Mkuu wa Mkoa wa Dodoma Mhe Rosemary Senyamule kwa niaba ya Mhe. Rais na ameitoa mbele ya wananchi wa Kata hiyo wakiwa na viongozi wao.

"Ardhi yote ni mali ya Serikali, Waziri alipokuja hapa alifikisha hili jambo kwa Mhe Rais aamue na ametoa suluhu kwa Wanakingale. Amesema eneo lenye mgogoro la ukubwa wa ekari 7,495.74, ekari 3,272.4 zibaki kwa wananchi watumie kwa shughuli za kilimo, mifugo na za kiuchumi na Magereza watachukua ekari zilizobaki" amesema Mhe. Senyamule

Mbali na kuwasilisha utatuzi pia Mhe Rais ameagiza mambo kadhaa yafanyike katika eneo hilo;

"Mhe. Rais ameagiza kuwa ndani ya mwezi mmoja, watu wa ardhi waje kuonyesha utaratibu wa maeneo yaliyogawanywa, lipimwe na alama ziwekwe zinazoonekana na kila mmoja. Vijiji viendelee kutunza mipaka kuzuia mwingiliano wa matumizi, Magereza pia mtunze mipaka, wananchi wapo upande wa Bonde linalofaa kwa umwagiliaji. Wizara ya Kilimo mfanye utaratibu wa kujenda mabwawa kwa ajili ya umwagiliaji, mifugo pia mjenge majosho kwa ajili ya kuosha mifungo ya wananchi" Ameongeza Mhe. Senyamule

Kadhalika, Mkuu wa Mkoa amewataka wananchi hao kufanya maendeleo kwa kushirikiana na Jeshi la Magereza kwani mgogoro umekwisha hivyo kutokana na miundombinu itakayojengwa kwenye eneo hilo, itawawezesha kupiga hatua kubwa kwa haraka na kumfanya Mhe. Rais kujivunia kuwapatia eneo hilo.

Naye Mbunge wa Jimbo la Kondoa Mji Mhe. Ally Makoa, ameongea na wananchi hao kwa kusema kuwa mapendekezo yao ya kupatiwa eneo la hilo kutoka kwenye mpaka wa Magereza waliyowasilisha kwa Mhe. Rais, ndicho kilichoamuliwa hivyo wananchi hao wataendelea kutumia eneo lao la mashamba huku Magereza nao wakibaki na eneo lilikubaliwa kama ilivyoelekezwa. Hakusita kutoa pongezi zake kwa Mhe. Rais Dkt. Samia Suluhu Hassan kwa kuleta wataalamu kutoka Wizarani kwa ajili ya kujenga miundombinu kwenye eneo hilo pamoja na kuridhia mapendekezo ya wananchi.