RAS DODOMA ATEMBELEWA NA UGENI KUTOKA CDC AFRIKA

Imetumwa : December 4th, 2024

Na. Hellen M. Minja,

       Habari – DODOMA RS

Katibu Tawala Mkoa wa Dodoma Bw. Kaspar K. Mmuya, amepokea ugeni kutoka Shirika la  Afrika linalojishughulisha na kuzuia magonjwa(Centre for Disease Control and Prevention(CDC) Afrika,ukiwa na lengo la kujifunza namna Tanzania ilivyoweza kushusha vifo vya Mama wajawazito na watoto wachanga wakati wa kujifungua.

Ugeni huo umefika kwenye ofisi yake iliyopo jengo la Mkapa Jijini Dodoma ukiongozwa na mwakilishi kutoka Wizara ya Afya Dr. Phineas F. Sospeter ambaye ni Mkuu wa Programu ya Uzazi salama.

Katibu Tawala Mkoa amewakaribisha Dodoma na kuelezea namna nchi yetu ilivyofanikiwa katika hilo na kushauri nini cha kufanya

“Mkitaka kujifunza zaidi juu ya nini Tanzania imekifanya, muone Rais wetu kwani ameonesha kwa vitendo mapambano dhidi ya vifo vya kina mama na watoto wachanga lengo likiwa ni kuvimaliza kabisa. Nawashauri mlenge kwenye kumaliza kabisa vifo hivi na si kulenga idadi kadhaa kwani inawezekana.

“Tengenezeni sheria ndogo ndogo na mziwasilishe Serikalini, kwani kazi ya Serikali ni kuzipitia na kutengeneza mazingira mazuri ya kazi mfano M-MAMA imeanzishwa kwa ajili ya kurahisisha usafiri wa dharura kwa mama wajawazito. Huko vijijini mtaona mashine za kutolea huduma za vipimo kama MRI na nyingine ambazo zinarahisisha upatikanaji wa huduma karibu na wananchi” Amesema Bw. Mmuya.

Miongoni mwa wawakilishi kutoka katika Shirika hilo waliofika ofisini hapo ni kutoka nchi 12 ambazo ni mwenyeji Tanzania, Kenya, Uganda, Somalia, Gambia, Congo DRC, Nigeria, Zambia, Chad, Misri, Guinea na Lesotho ambapo wamepanga kutembelea vituo vya afya vya Soya (Wilaya ya Chemba) na Haneti katika Wilaya ya Chamwino.

#dodomafahariyawatanzania

#keroyakowajibuwangu         #mtiwangubirthdayyangu