RC Mtaka aanza kazi ya kunyanyua Kilimo cha zao la zabibu Mkoani Dodoma, afanya ziara ya kujifunza kwenye mashamba ya Zabibu ya Waziri Mkuu Mstaafu Mhe. Mizengo Pinda huko Zinje (Zuzu) Mkoani Dodoma

Imetumwa : June 4th, 2021

HABARI KATIKA PICHA

Mkuu wa Mkoa wa Dodoma Mhe. Anthony Mtaka ameanza rasmi kazi ya kunyanyua Kilimo cha zao la Zabibu Mkoani Dodoma, ameandaa ziara ya kujifunza ya Viongozi wa Mkoa wa Dodoma, Wataalamu wa Kilimo na Wakurugenzi wa mabenki na taasisi za kifedha kama vile benki ya Maendeleo ya Kilimo - TADB, CRDB, NMB na Wataalamu wa hifadhi za Mazingira kumtembelea Waziri Mkuu Mstaafu Mhe. Mizengo Pinda huko nyumbani kwake Zinje (Zuzu) nje kidogo ya Jiji la Dodoma; Mhe. Pinda ni Mkulima wa mfano wa zao la Zabibu za aina mbalimbali kama zile za kutengenezea Mvinyo na zile za kula kama matunda, kwa muda wote ameendesha shughuli hiyo ya Kilimo cha Zabibu hapo nyumbani kwake Zinje (Zuzu). Ziara hiyo ilihusisha  kukagua mashamba ya Zabibu, kupata maelezo ya kitaalamu ya uzoefu wa Kilimo cha Zabibu kutoka kwa Mhe. Pinda na kuanza majadiliano ya kuandaa mikakati mipya ya kuendeleza na kukuza zao hilo katika Mkoa wa Dodoma. Kutokana na gharama ya mtaji wa kuanzisha na kuendelea kusimamia Kilimo cha zao la Zabibu, katika ziara hiyo Mhe. Mtaka aliambatana na Mkurugenzi Mkuu wa Benki ya Maendeleo ya kilimo - TADB Bw. Japhet Justine, Meneja wa Kanda ya Kati wa Benki ya CRDB Bi. Chabu Mishwaro na Meneja wa Kanda ya Kati wa Benki ya NMB Bw. Nsolo Mlozi ili kuona uwezekano wa kushirikisha Taasisi hizo za kifedha kuwekeza mitaji na fedha za kuendeshea kilimo cha Zabibu na kukuza mnyororo wake wote wa thamani katika zao hilo.

Ziara ya mafunzo kwenye mashamba ya Zabibu ya Waziri Mkuu Mstaafu Mhe. Mizengo Pinda huko Zinje (Zuzu) Mkoani Dodoma, Waziri Mkuu Mstaafu Mhe. Mizengo Pinda (kulia) akiendelea kutoa maelezo ya uzoefu wake kwa Mkuu wa Mkoa wa Dodoma Mhe. Anthony Mtaka na Wadau wa Kilimo cha Zabibu alioambatana nao katika ziara hiyo.

Ziara ya mafunzo kwenye mashamba ya Zabibu ya Waziri Mkuu Mstaafu Mhe. Mizengo Pinda huko Zinje (Zuzu) Mkoani Dodoma, Mkuu wa Mkoa wa Dodoma Mhe. Anthony Mtaka (kushoto) akibadilishana uzoefu na  Waziri Mkuu Mstaafu Mhe. Mizengo Pinda (kulia)