RC SENYAMULE AWAPONGEZA MADAKTARI BINGWA NA SHIRIKA LA JAI

Imetumwa : October 12th, 2024

Na. Sizah Kangalawe      
        Habari-DODOMA RS

Mkuu wa Mkoa wa Dodoma Mhe. Rosemary Senyamule, amefunga rasmi kambi ya matibabu iliyoendeshwa na Madaktari bingwa na bingwa bobezi wilayani Kondoa mkoani hapa kwa

kuishukuru Taasisi ya  kiislam ‘’JAMIIYAATUL AKHLAAQUL ISLAM (JAI)’’, Benki ya Amana pamoja na madaktari bingwa kwa moyo wao wa kujitolea kuiunga mkono Serikali katika kutoa  huduma za kibingwa na bingwa bobezi kwa watanzania wa hali ya chini na wasiojiweza.

Mhe. Senyamule ametoa pongezi hizo katika hafla fupi ya kuwaaga Madaktari hao iliyofanyika katika Ukumbi wa Mikutano wa Hoteli ya Morena Oktoba 12/2024 Jijini Dodoma ambapo amewaahidi kuwatengenezea vyeti vya pongezi/ shukrani kwa kutambua mchango walioutoa kwa wananchi wa Wilaya ya Kondoa na Wilaya Jirani.

‘’Sisi Mkoa wa Dodoma tunashukuru kwa huduma yenu, kazi mnayoifanya hatuna cha kuwalipa na kwa kuwa tumefaidika moja kwa moja na huduma hii tutawatengenezea vyeti vya Shukrani kwa kufanya kazi nzuri, tunawakaribisha tena mukipata wasaa wa kututembelea, Karibuni sana’’. Mhe. Senyamule

Akizungumza katika hafla hiyo Kiongozi wa kambi hiyo Dkt. Hussein Msuma,  amesema Wakazi 2,808 wa Wilaya ya Kondoa na Wilaya Jirani, wamepatiwa huduma pamoja na kukamilisha operesheni 73 za kibingwa pasi na kuchangia gharama yoyote.

Kambi hiyo imefanyika kwa juma moja ikiwa na jumla ya mabingwa 26. Ni kambi ya 13 kufanyika kwa uratibu wa Shirika la JAI ambalo huandaa kambi hizo likiwa na dhamira kuu ya kuwasaidia wananchi wasiojiweza kupatiwa huduma za kibingwa, kuwajengea uwezo madaktari na watoa huduma katika vituo husika pamoja na kuhamasisha zoezi la uchangiaji wa damu.

kwa upande wake Mkurugenzi wa Benki ya Amana Bw. Abubakar Athuman Ali, ameahidi kuendelea kudhamini kambi hizo  kwa kushirikiana na Shirika hilo na  watahakikisha watanzania wengi zaidi wenye uhitaji wanafikiwa na kambi hizo katika maeneo mbalimbali ya nchi yetu.

Benki ya Amana inadhamini kambi hizo za matibabu zinazoratibiwa na Shirika la JAI pamoja na Madaktari bingwa toka Hospitali mbalimbali nchini kupitia mfuko wake wa hisani unaojulikana kama Amana Bank Charity Fund.