RC SENYAMULE AAGIZA WATOTO 100 WASIOWASILI SHULENI WATAFUTWE

Imetumwa : February 11th, 2025

Na. Hellen M. Minja,

       Habari – DODOMA RS

Mkuu wa Mkoa wa Dodoma Mhe. Rosemary Senyamule, ametaka hatua za kisheria zichukuliwe kwa Wazazi watakaobainika kuwa hawajawapeleka watoto wao shule mpaka sasa kufuatia taarifa aliyoipokea juu ya watoto 100 ambao bado hawajawasili shuleni tangu kuanza kwa muhula mpya wa masomo.

Hayo yamebainishwa Februari 11, 2025 na Mhe. Rosemary Senyamule alipokua akizungumza na wazazi wakati alipotembelea na kukagua mradi wa ujenzi wa shule mpya ya Sekondari ya Mlali Bondeni iliyogharimu shilingi 544,000,000 alipofanya ziara ya kikazi kukagua miradi ya shule katika Wilaya ya Kongwa.

“Lazima tuhakikishe watoto wanakwenda shuleni, hao watoto 100 watafutwe walipo, Mwalimu peleka orodha ya watoto ambao hawajafika shule kwa Mtendaji na ifikapo Jumatatu, nipate taarifa ya wazazi wangapi wameshapeleka watoto shule na wangapi bado, na hatua gani zimechukuliwa.

“Mnaona jengo hili lilivyo zuri? haiwezekani yajengwe vizuri hivi halafu mtoto asiende shule, tutakua tunajikwamisha wenyewe. Wiki hii hapa hapatatulia mpaka watoto hao 100 wafike shule”. Ameongeza Mhe. Senyamule.

Nae, Mbunge wa Jimbo la Kongwa na Spika wa Bunge Mstaafu Mhe. Job Ndugai, alisisitiza suala la elimu kwa watoto wakati wa Mkutano wa hadhara wa Mkuu wa Mkoa wa Dodoma na wananchi wa Kata ya Sagara.

“Kongwa tumepambana sana katika kukuza elimu na ufaulu wetu umeongezeka. Kwa hiyo tujipange kusomesha watoto, hamuwezi kujua kesho na kesho kutwa watakua kina nani katika Wilaya yetu ya Kongwa na katika nchi hii” Mhe. Ndugai

Katika Mkutano huo, Mhe. Senyamule alisikiliza kero za wananchi wa Kata ya Sagara na kuzipatia majawabu papo hapo kutoka kwa wataalamu alioambatana nao kwenye ziara hiyo huku akitoa maagizo kadhaa kwa baadhi yao kuhakikisha wanatatua kero hizo kwa wakati.

Miradi mingine aliyoitembelea ni ujenzi wa Maabara ya masomo mchanganyiko ya sayansi katika shule ya sekondari Msunjilile inayogharimu shilingi Milioni 60 fedha za ndani za Halmashauri,Mabweni mawili na matundu 10 ya vyoo katika shule ya Sekondari Sejeli kwa gharama ya shilingi 267,000,000

#dodomafahariyawatanzania

#keroyakowajibuwangu

#mtiwangubirthdayyangu