SAMIA INFRASTRUCTURE BOND YACHANGISHA ZAIDI YA BILIONI 1.5 DODOMA

Imetumwa : December 16th, 2024

Na. Hellen M. Minja,

       Habari – DODOMA RS

Kufuatia uzinduzi wa mfuko wa hati fungani unaojulikana kama ‘Samia Infrastructure Bond’ unaolenga kuboresha barabara zilizo chini ya Wakala wa Barabara Mijini na Vijijini (TARURA) kwa kushirikiana na Benki ya CRDB, harambee ya kuchangia mfuko huo imefanyika leo Desemba 16, 2024, ambapo Mkoa wa Dodoma umechangisha takribani shilingi Bilioni 1.5

Harambee hiyo iliyoongozwa na Mkuu wa Mkoa wa Dodoma Mhe. Rosemary Senyamule, imefanyika katika ukumbi wa Mabele Jijini Dodoma na kuhudhuriwa na viongozi wa Mkoa wa Dodoma, mikoa ya jirani ya Singida, Morogoro na Iringa pamoja na Taasisi mbalimbali za Umma na Binafsi zilizopo Mkoani hapa.

“Hati fungani hii inalenga kukusanya fedha na kuhakikisha ujenzi wa barabara zetu unakamilika kwa wakati,lakini pia inatoa fursa kwa wawekezaji kupata faida kwa fedha wanazowekeza. Tutumie fursa hii kujenga barabara imara zitakazokamilika kwa wakati na kuinua uchumi” Amesema Mhe. Senyamule.

Kadhalika, Naibu Katibu Mkuu wa OR - TAMISEMI Mhandisi Rogatius Mativila amesema

“Hati fungani hii ni ya kwanza kutolewa Nchini na Mhe. Rais Samia, na inaonesha dhamira yake ya uharaka wa maendeleo ya Watanzania. Bondi hizi zitahusisha Wakandarasi wanaotengeneza barabara za Wilaya tu, sisi ni walengwa na wanufaika wakubwa kuliko wengine”

Aidha, Mwakilishi wa Meneja wa CRDB Kanda ya Kati Bw. Andrew Mheziwa, amesema hati fungani hiyo ni ya miaka mitano ambapo ilizinduliwa rasmi Novemba 09, 2024 na Makamu wa Rais Mhe. Philip Mpango kwa niaba ya Rais Mhe. Dkt. Samia Suluhu Hassan na inahusisha kila Mwananchi / Vikundi au Taasisi ambapo kianzio ni shilingi 500,000

Akiongea kwa niaba ya Wakandarasi, Mwenyekiti wa chama cha Wakandarasi Mhandisi Vivian Komu, ameishukuru CRDB na ujio wa mfuko huo kwani wakandarasi wengi watanunua hisa na atakayefaidika zaidi ni mwenye mradi kwani itarahisisha upatikanaji wa fedha na kurahisisha miundombinu ya nchi kwa maendeleo ya Taifa na uzalishaji wa uchumi.

Samia Infrastructure Bond’ ni hati fungani ya kipekee ya miaka mitano yenye riba ya 12% ambapo faida yake inalipwa kwa mwaka mara nne, kila baada ya miezi mitatu na ununuzi wa hati fungani ni kwa kipindi cha mwezi mmoja ambapo zoezi limeanza na litafungwa rasmi Januari 17, 2025 na mfuko huo unatarajiwa kuchangisha kiasi cha shilingi Trilioni 16.

#dodomafahariyawatanzania                                  

#keroyakowajibuwangu

 #mtiwangubirthdayyangu