SENYAMULEA ATOA RAI KWA WANAWAKE KUINUANA KIUCHUMI

Imetumwa : March 27th, 2023

Mkuu wa Mkoa wa Dodoma Mhe. Rosemary Senyamule amewataka wanawake kutumia fursa za makongamano mbalimbali ili kubadilishana maarifa na kuinuana kiuchumi bila kujali viwango vya vipato vyao na kupeana uzoefu wa Mambo mbalimbali.

Akizungumza na wanawake katika kongamano la jukwaa la wanawake la kuwainua kiuchumi mkoa lililofanyika katika ukumbi wa Cathedral jijini Dodoma leo tarehe 27/03/2023 Senyamule amesema wanawake wanapaswa kushirikiana na kupeana fursa mbalimbali pale zinapojitokeza.

"Kila mtu ana nafasi yake kuna wafanyabiashara, wakulima yaani hapa tunakutana watu mbalimbali na wenye uzoefu tofauti tofauti kwahiyo ukija maeneo kama haya hakikisha unaondoka na kitu kipya na cha ziada bila kujali vyeo vyenu, uwezo wenu kifedha na nyadhifa zenu mkiwa hapa endeleni kuwa kitu kimoja.

"Tunazo fursa nyingi katika mkoa wetu natamani kuwaona wanawake mabilionea wengi kutoka Dodoma wametokea baada ya Mhe. Dkt. Samia Suhulu Hassan kutengeneza fursa nyingi hivyo kama huna fursa jishikamanishe na wenzio na kama unayo waambie wenzako hata ukiwainua watano bado umechangia kuwainua kiuchumi" Amesema Senyamule

Kwa upande wake Mwenyekiti wa jukwaa la uwezeshaji wanawake kiuchumi Mary Bwire ameishukuru Serikali ya Mkoa wa Dodoma kwa kuwapa Ushirikiano mzuri pindi wanapohitaji  kufanya kazi ya jukwaa hilo jambo linalorahisisha kufanyika kwa urahisi.

"Kipekee niwashukuru uongozi wa Mkoa wa Dodoma kuanzia kwa mbunge wetu Mhe. Mavunde na Ofisi ya Mkoa nimeshirikiana nao sana katika kulifanikisha hili  kongamano, muda mwingine nawapigia simu usiku lakini hawakuchoka kunipa Ushirikiano niwashukuru tena na niwaombe msinichoke katika kuendelea kujenga fursa kwa wanawake wa Dodoma" Bwire

Aidha katika kongamano Hilo Mhe. Senyamule amepokea tuzo ya pongezi kwa niaba ya Rais Dkt. Samia Suluhu Hassan kwa kuanzishwa majukwaa ya uwezeshaji kiuchumi Nchini Jambo ambalo wanawake wananufaika nalo.