SERIKALI KUZINDUA SERA YA MAENDELEO KWA VIJANA

Imetumwa : July 30th, 2024

Mkuu wa Mkoa wa Dodoma Mhe. Rosemary Senyamule amelipongeza Shirika la Dodoma Youth Development Organization (DOYODO) Kwa kushirikiana na wadau wengine wa Maendeleo Kwa kuandaa jukwaa la siku mbili la Maendeleo ya vijana ambalo hufanyika Kila Mwaka.

Pongezi hizo zimetolewa na Mhe. Senyamule Julai 30 katika ukumbi wa Mikutano wa PSSSF, Makole Jijini Dodoma wakati wa uzinduzi wa kongamano hilo.

Mhe. Senyamule amesema " niwapongeze DOYODO na wadau wengine Hakika ipo kazi kubwa na nzuri ambayo mmefanya, jukwaa hili na makongamano mengine mengi ya vijana nchini yanalenga katika utekelezaji wa Sera ya Maendeleo ya vijana ya Mwaka 2007, hivyo ni wajibu wa Serikali kupitia ofisi ya vijana kuwapa ushirikiano wa kutosha katika kufanikisha majukwaa hayo".

Hatahivyo Mkuu wa Mkoa huyo ameweka bayana mpango wa Serikali wa kuzindua Sera mpya ya Maendeleo ya vijana inayoendana na ukuaji wa teknolojia ya kisasa.

"Ndugu zangu Serikali yenu Iko mbioni kuzindua Sera mpya ya Maendeleo ya vijana ambayo inaendana na Kasi ya ukuaji wa teknolojia Duniani Ili kuboresha zaidi Maendeleo ya vijana nchini na kuweka mazingira mazuri ya Kisera" ameweka bayana Mhe. Senyamule

Kwa upande wake  Mwenyekiti wa Bodi ya uratibu wa Mashirika yasiyo ya kiserikali Bi.Mwantumu Mahiza, ametumia fursa ya kongamano hilo kuwataka vijana kuzingatia maadili ya Nchi yetu na kuachana na tamaduni za kimagharibi zisizo na maadili ya Kitanzania.

Kongamano hilo limewajumuisha vijana 600 kutoka Kona zote za Mikoa ya Tanzania Bara na visiwani  pamoja Nchi Jirani kama Uganda.

#keroyakowajibuwangu #dodomafahariyawatanzania

&&&