WAKANDARASI WATAKIWA KUKAMILISHA MIRADI KWA WAKATI

Imetumwa : April 23rd, 2024

Mkuu wa Mkoa wa Dodoma Mhe. Rosemary Senyamule amewataka wakandarasi na wasimamizi wa miradi mbalimbali ya serikali inayotekelezwa katika Mkoa huo, kuhakikisha wanakamilisha Kwa wakati na ubora unaotakiwa.

Hayo yamebainishwa na Senyamule wakati wa ziara yake ya kikazi katika Halmashauri ya Jiji la Dodoma iliyofanyika Leo Aprili 23,2024.

Akizungumza wakati wa ukaguzi wa ujenzi wa jengo la Mionzi ya kutibu Saratani katika Hospitali ya Benjamini Mkapa Mhe. Senyamule ameuagiza uongozi wa Hospitali hiyo kuhakikisha mradi huo unakamilika Kwa muda uliokusudiwa.

"Hakikisheni mnatafuta namna ya kuongeza masaa ya kazi na wafanyakazi Ili kukamilisha mradi Kwa wakati na ubora uliokusudiwa ili wananchi wapate huduma bora kutoka katika jengo hili ambalo litakuwa msaada Kwa wanadodoma na Watanzania.

"Suala la kumaliza miradi kwa Mkoa huu linatakiwa kuwa kaulimbiu Kwa miradi yote inayotekelezwa hapa, pia watumishi wote mnatakiwa kutoa huduma bora zinazoendana na ubora na ukubwa wa majengo ambayo Serikali imetoa fedha kukamilisha miradi hiyo", amesema Senyamule

Kwa upande wa Mkurugenzi mtendaji wa Hospitali hiyo Dkt. Alphonce Chandika amekiri kuwa kukamilika Kwa mradi huo kutaondoa adha kwa wananchi kusafiri umbali mrefu kufuata huduma hiyo.

" Mradi huu utakuwa mkombozi kwa wananchi watakaobainika na Saratani, tumeshuhudia wanananchi wakipata changamoto kwasababu hapa tulikua tunatoa huduma nusu na kumlazimu mgonjwa kwenda muhimbili kwaiyo kukamilika Kwa mradi huu kutawezesha wananchi kupata zote hapa pasipo kuwalazimu kusafiri umbali mrefu", Dkt. Chandika

Aidha Mhe. Senyamule amekagua ujenzi wa Hospitali ya wilaya ya Dodoma, ukarabati wa madarasa ya Shule ya msingi Amani, ukaguzi wa Shule ya Dodoma English Medium pamoja na ukaguzi wa ujenzi wa jengo la Mionzi ya kutibu Saratani katika Hospitali ya Benjamini Mkapa.