WALIMU WA MICHEZO WA SHULE ZA MSINGI NA SEKONDARI MKOANI DODOMA WAPIGWA MSASA

Imetumwa : April 12th, 2022

Mkurugenzi wa Michezo kutoka OR – TAMISEMI Ndugu Leonard Thadei  akizindua mafunzo kwa walimu wa michezo wa shule za Msingi na Sekondari za Jijini Dodoma yanayofanyika katika Shule ya Sekondari ya Dodoma.

Mwakilishi wa Katibu Tawala wa Mkoa wa Dodoma Bw. Justine Machela akitoa neno kwa walimu wa michezo wa Mkoa wa Dodoma wakati wa uzinduzi wa Mafunzo ya kuwapatia ujuzi walimu hao ili waweze kuwanoa wanafunzi kimichezo kwa ajili ya kujiandaa na mashindano ya UMITASHUMTA na UMISETA ya mwaka huu.

Baadhi ya walimu wa michezo kutoka shule mbali mbali za Msingi na Sekondari  Mkoa wa Dodoma wakiwa kwenye picha ya pamoja mara baada ya kukamilika kwa uzinduzi wa Mafunzo ya kuwapatia ujuzi wa kufundisha michezo kwa wanafunzi.

HABARI KAMILI

Mkoa wa Dodoma umezindua mafunzo maalumu kwa walimu wa Michezo wa shule za Msingi na Sekondari za Mkoa wakati huu wa kuelekea kwenye mashindano ya Kitaifa ya michezo kwa Shule za Msingi (UMITASHUMTA) na shule za Sekondari (UMISETA) yanayotarajiwa kufanyika mwezi Agosti mwaka huu Mkoani Tabora.

Uzinduzi wa mafunzo hayo umefanywa Aprili 12, 2022 na Bwana Leonard Thadei, Mkurugenzi wa michezo OR-TAMISEMI kwenye viwanja vya shule ya sekondari ya Dodoma. Mafunzo hayo yanafanyika kwa siku Tatu (3) na yatahitimishwa Aprili 14, 2022.

Mwakilishi wa Katibu Tawala wa Mkoa wa Dodoma Bw. Justine Machela alisema kuwa, Mkoa umeamua kuendesha mafunzo hayo kwa walimu wa michezo kufuatia changamoto kadhaa zilizojitokeza kwenye mashindano ya UMISETA na UMITASHUMTA ya mwaka jana 2021, yaliyofanyika huko Mkoani Mtwara ambapo Mkoa wa Dodoma haukufanya vizuri kiasi cha kuridhisha na hivyo Kamati ya michezo kimkoa ikaona umuhimu wa kuandaa mafunzo haya maalum .

Mafunzo haya yanashirikisha walimu wa michezo 96 kutoka shule za msingi na sekondari Mkoa wa Dodoma pamoja na wakufunzi 12 wa Michezo mbali mbali kama vile mpira wa miguu, riadha, mpira wa pete, mpira wa kikapu na mingine mingi, lengo likiwa Mkoa wa Dodoma kuibuka mshindi kwenye mashindano ya mwaka huu.