WANAWAKE KANDA YA KATI WASISITIZWA KUFUATA NYAYO ZA DKT.SAMIA

Imetumwa : March 4th, 2025

Na. Hellen M. Minja,

Habari - DODOMA RS

Serikali ya awamu ya sita chini ya Rais wake Mhe. Dkt. Samia Suluhu Hassan, inaendelea kufanya jitihada mbalimbali kuhakikisha Wanawake wanashiriki kugombea nafasi za uongozi Serikalini kuanzia ngazi za chini na zile za juu kwani imethibitishwa kuwa wanaweza kupitia nafasi ya juu aliyoipata Mhe. Rais nchini.

Hayo yamebainishwa na Spika Mstaafu wa Bunge la Jamhuri ya Muungano wa Tanzania Mhe. Anna Makinda, alipokua akizungumza na Wanawake waliojitokeza kwenye Kongamano la Wanawake kuelekea siku ya Wanawake Duniani kwa Mikoa ya Kanda ya Kati lililofanyika katika kituo cha Mikutano Jakaya Kikwete Jijini Dodoma Machi 03, 2025.

"Serikali kupitia Rais Samia Suluhu Hassan, imesisitiza ushiriki wa Wanawake katika nafasi za uongozi. Jitihada hizi ni kutokana na Rais wetu kuwa kinara kuhakikisha Wanawake wanashiriki kugombea nafasi za uongozi Serikalini kwa kuendelea kutambua na kuhakikisha changamoto za Wanawake zinasikika" Mhe. Anna Makinda

Kadhalika, Naibu Katibu Mkuu Wizara ya Maendeleo ya Jamii, Jinsia, Wanawake na Makundi Maalum, anayeshughulikia Makundi maalum Wakili Amon Mpanju, amesema Maadhimisho ya mwaka huu yatakwenda sambamba na tathmini ya miaka 30 ya Beijing hivyo, Wanawake wataweka mikakati ya kuhakikisha wanafikia usawa wa maendeleo yao na jamii kwa ujumla.

Hata hivyo, Mkuu wa Mkoa wa Dodoma Mhe. Rosemary Senyamule, amempongeza Mhe. Rais Samia Suluhu Hassan kwani yeye ndiye chachu ya Wanawake kujivunia leo huku akitoa takwimu za viongozi Wanawake katika Mkoa wake.

"Mkoa unaongozwa na viongozi Wanawake ikiwemo Mimi Mkuu wa Mkoa 100%, Wakuu wa Wilaya 71%, Makatibu Tawala Wilaya 86%, Wabunge wa Majimbo 11%, Wakurugenzi wa Halmashauri 25%, Madiwani 14%, Watendaji Kata 38%, Watendaji wa Vijiji 49% na Wenyeviti wa Vijiji na mitaa ni 5% hivyo tunayo kazi ya kuwajengea uwezo Wanawake wenye viti wa Mitaa kujitokeza zaidi". RC Senyamule

Kongamano la Wanawake kuelekea kilele cha Maadhimisho ya siku ya Wanawake Duniani Machi 08, 2025  yanayotarajiwa kufanyika Mkoani Arusha, ni maalum kwa kuwa limeendana na mada kama vile, namna taasisi za elimu ya juu zinavyosaidia wanafunzi wa kike kushika nafasi za uongozi, jinsi ya kupambana na rushwa ya ngono kazini, uwezeshaji Wanawake kiuchumi na kupinga ukatili wa kijinsia.

Kongamano hilo la Kanda ya Kati, limehusisha Mikoa ya Singida, Dodoma na Iringa huku likisimamia Kauli mbiu ya "Wanawake na Wasichana 2025: Tuimarishe Haki, Usawa na Uwezeshaji" na kuongozwa na mada kuu ya "Wanawake na Uongozi katika miaka 30 ya Beijing"

#dodomafahariyawatanzania

#keroyakowajibuwangu

#mtiwangubirthdayyangu