WANAWAKE TAASISI ZA ELIMU YA JUU TAIFA 2024 WAKUTANA DODOMA

Imetumwa : September 12th, 2024

Umoja wa Kamati ya Wanawake THTU Taifa imefanya mkutano wake wa mwaka 2024 wenye lengo la kuwaleta pamoja wanawake viongozi katika Taasisi za elimu ya juu Tanzania. Mkutano huo wa siku mbili unafanyika kwenye ukumbi wa ofisi ya Mkuu wa Mkoa wa Dodoma.

Mkutano huo uliofunguliwa na Mheni rasmi, Mkuu wa Mkoa wa Dodoma Mhe. Rosermary S. Senyamule, umehusisha mawasilisho ya mada mbalimbali zikiwemo likizo za uzazi na unyonyeshaji pamoja na masuala ya bima ya afya.

Katika hotuba yake, Mkuu wa Mkoa huyo ametaja mambo mbalimbali yaliyofanywa na Serikali ya awamu ya sita katika kuimarisha taasisi za elimu ya juu.

“Serikali imeongeza fedha kwa ajili ya ufanyaji tafiti kwa dhamira ya kuwawezesha wasomi kutupatia majawabu, kuna miradi ya HIT ya kuimarisha miundombinu ya chuo na kufanya mazingira bora ya kusomea kwenye vyuo na vyuo vikuu.

“Aidha Serikali imeongeza mikopo ya elimu ya juu ambapo haya yote yatangeza chachu kwa wasomi hawa kuongeza bidii kwenye masomo yao kwani tayari wazazi wamepunguziwa mzigo. Ukiwa mwanamke una wajibu mkubwa wa kuonesha uwezo wako kuliko hata mwanaume” Amesema Mhe. Senyamule.

Katika hotuba yao, wanawake hao wameiomba Serikali kuboresha kikokotoo ili mfanyakazi anapostaafu apate 50% ya mafao yake kwani itatoa motisha kwao kuishi maisha ya staha baada ya kustaafu pia ihakikishe wafanyakazi wote wananufaika na ongezeko la mshahara.

Kadhalika, Mratibu Mkuu wa Kamati hiyo Taifa Bi. Salma Fundi, amesema kuwa mikutano hiyo ya mwaka huwawezesha wanawake kupeana elimu, uwezo na kuwasilisha changamoto wanazokumbana nazo mahali pa kazi kwa mwaka mzima.

Mkutano huo wa mwaka 2024 ulioanza Septemba 12 hadi 13, umeongozwa na kauli mbiu isemayo, “Uwezeshaji wa mwanamke, uboreshaji wa kikokotoo na mfuko wa bima ya afya kwa ajira bora, afya imara na ushiriki wa kidemokrasia 2024”

#dodomafahariyawatanzania

#keroyakowajibuwangu