WATOA HUDUMA ZA MALAZI NA USAFIRISHAJI WAASWA KUTOA HUDUMA BORA KWA WAGENI

Imetumwa : January 13th, 2025

Na. Hellen M. Minja

       Habari, DODOMA RS

Katibu Tawala Mkoa wa Dodoma Bw. Kaspar K. Mmuya, Januari 13, 2025, alikutana na watoa huduma za malazi na usafirishaji Jijini Dodoma, kuzungumzia namna ya kuimarisha na kuboresha utoaji huduma kwa kuzingatia Mkoa wa Dodoma unakwenda kupokea wageni wengi kipindi hiki cha kuelekea mkutano mkuu maalum wa CCM Taifa utakaofanyika katika ukumbi wa Mikutano wa Jakaya Kikwete Januari 18 na 19 .

Akifungua kikao hicho kilichofanyika kwenye ukumbi wa mikutano wa Ofisi ya Mkuu wa Mkoa wa Dodoma jengo la Mkapa Jijini humu, Katibu Tawala huyo amesema Mkoa wa Dodoma ndio wenye fursa nyingi za uwekezaji kwani utaendelea kupokea wageni wengi kadri miradi mikubwa ya maendeleo inavyokwenda kukamilika.

"Dodoma ndio Mkoa pekee wenye fursa mbichi na ndio maana tunahitaji uwekezaji kwenye maeneo ambayo shughuli zote za mikutano zitafanyikia kwa maana ya hoteli, kumbi nzuri, maeneo mazuri ya chakula na sehemu za starehe hivyo tuache uoga, tuwekeze kwani pia miradi mingi ya maendeleo inafanyika hapa ambayo inatengeneza fursa zaidi" Bw. Mmuya.

Aidha, Mwenyekiti wa Wamiliki wa Hoteli Jijini Dodoma Bw. Wellington Maleya, amesema kuwa Wamiliki wa Hoteli na nyumba za kulala wageni, wanapaswa kuajiri wahudumu wenye uzoefu na maadili mazuri kwani kumekua na malalamiko juu ya watoa huduma wasioridhisha kwenye baadhi ya sehemu hizo hali inayosababisha kushuka kwa biashara.

Vilevile, Mwenyekiti wa Umoja wa Madereva Pikipiki na Bajaji Dodoma (UMAPIDO) Bw. Chacha Marwa, ameiomba Serikali ya Mkoa kuchukua hatua kwa kusimamia matengenezo ya miundombinu ya Barabara za Jiji pindi zinapopata hitilafu, usafi wa mazingira pamoja na ujenzi unaozingatia mipango miji kwani hayo yanasaidia kulifanya Jiji kuwa na thamani.

#dodomafahariyawatanzania

#keroyakowajibuwangu

#mtiwangubirthdayyangu