WAZAZI WATAKIWA KUWAPELEKA SHULE WATOTO WOTE WENYE SIFA JANUARI 2025

Imetumwa : November 7th, 2024

Na. Hellen M. Minja,

       Habari - DODOMA RS

Wito umetolewa kwa wazazi na walezi kuhakikisha ifikapo mwezi Januari, 2025, mwanzo wa muhula mpya wa masomo, wanawapeleka shule watoto wote wenye sifa za kujiunga na kidato cha kwanza kutokana na ujenzi unaoendelea wa shule mpya ya Sekondari Simbachawene katika Kata ya Luhundwa, Kijiji cha Kidenge.

Hayo yamebainishwa Novemba 06, 2024, na Mkuu wa Mkoa wa Dodoma Mhe. Rosemary S. Senyamule alipoitisha mkutano wa hadhara na wananchi wa Kata hiyo baada ya kukagua ujenzi wa Shule ya Sekondari Simbachawene katika Kijiji hicho ikiwa ni ziara yake ya kikazi aliyoifanya katika Halmashauri ya Wilaya ya Mpwapwa.

Mhe. Senyamule amewataka wazazi kuwapeleka watoto wao shule kwa wingi kwani shule inajengwa kijijini kwao, hivyo itapunguza kutembea umbali mrefu kufuata huduma hiyo katika Vijiji vya Jirani.

"Maadam tumeletewa shule karibu, watoto wote waliofaulu, wazazi hakikisheni wanakwenda shule. Pasiwepo na Mtoto aliyefaulu ambaye hatakwenda shule. Nataka tija, tuone matunda ya fedha za Serikali zilizotolewa kwenu na Mhe. Rais" Amesema Mhe. Senyamule.

Akisoma taarifa ya mradi wa shule hiyo, Mwalimu Mkuu wa Shule ya Sekondari Luhundwa Frank O. Kawonga, amesema shule yake ilipokea shilingi 544,225,626 kwa ajili ya ujenzi wa shule mpya ya Simbachawene kwa lengo la kupunguza msongamano kwenye shule ya Sekondari Luhundwa.

Mradi wa Shule hiyo utajengwa miundombinu 11 ambayo ni vyumba vya madarasa 4, ofisi 1, jengo la Utawala, Maabara ya kemia na baiolojia, Maabara ya fizikia, maktaba, chumba cha TEHAMA, vyoo vya wanafunzi wa kiume matundu 4, vyoo vya wanafunzi wa kike matundu 4, kichomea taka pamoja na tenki la maji la ardhini.

Aidha, Mkuu wa Mkoa alitembelea mradi mwingine wa ujenzi wa shule mpya ya Sekondari Sijila iliyopo katika Kata ya Pwaga,ambao unatekelezwa  kwa gharama ya shilingi 544,225,626 ambapo mradi huo kwa sasa umefikia asilimia 22 na kazi inaendelea,huku ukitarajiwa kukabidhiwa tarehe 25/12/2025 ukiwa na majengo 11.

Mradi mwingine uliotembelewa ni mradi wa usambazaji huduma ya maji katika Vijiji vya Pwaga, Mingowi, Itende na Maswala. Mradi huo unaogharimu shilingi 4,302,281,669.70 una uwezo wa kubeba ujazo wa lita 75,600 huku ukitarajiwa kunufaisha wananchi takriban 13,971, unasimamiwa na Wakala wa Usambazaji Huduma za Maji Vijiji (RUWASA).

Awali kabla ya kutembelea miradi hiyo, Mkuu wa Mkoa alikabidhi gari mpya kwa Meneja wa RUWASA Wilaya ya Mpwapwa, itakayotumika kurahisisha usimamizi na ufuatiliaji wa miradi ya Maji inayotekelezwa ndani ya Halmashauri hiyo kutokana na ubovu wa gari iliyokuwepo.

#kurayakosautiyako

#ujanjanikupigakura

#dodomatupotayarikupigakura

#mtiwangubirthdayyangu