JAMII YAASWA KUZINGATIA MAKUNDI 6 YA VYAKULA KATIKA MILO YA WATOTO

Imetumwa : June 10th, 2025

Na; Happiness E. Chindiye    

Habari - Dodoma RS

Wataalam wa Lishe kutoka Wizara ya Afya wamewashauri wazazi na Walezi hasa wenye watoto walio na umri wa kuanzia Miezi 6 kuepuka kuchanganya nafaka zaidi ya moja kwa ajili ya kutengeneza unga wa lishe na badala yake wawaandalie mlo unaotokana na mchanganyiko wa makundi 6 ya vyakula.

Ushauri huo umetolewa tarehe 06.06.2025 wakati wa mwendelezo wa kampeni ya kuhamasisha ulaji wa vyakula vilivyoongezwa virutubishi kwa makundi mbalimbali wakiwemo Mama Wajawazito, wenye watoto chini ya miaka 5 na wanafunzi wa shule za sekondari.

Wakizungumza na Wakina Mama waliohudhuria Kliniki katika Hospitali ya Mtakatifu Gemma Jijini Dodoma  wataalam hao wameeleza kuwa bado jamii haina uelewa kuhusu aina ya vyakula na makundi yake.

“Tuna aina sita ya makundi ya vyakula na hayo ndio tunasisitiza wakati wa kuandaa mlo kila kundi liwekwe, ukitamani sana kubadilisha fleva basi ziwe tu mbili zisizidi zaidi ya mbili ” . - Afisa Lishe jiji la Dodoma Bi. Eva Semeni  Juma

Kuhusu ulaji wa vyakula vilivyoongezwa virutubishi, wataalam hao wamesema baadhi ya vyakula hivyo ni mbadala hasa kwa Mama Wajawazito wanaokutana na changamoto pindi wanapotumia vidonge vya Fefo.

“ Kupitia kampeni hii tunawahamasisha kutumia unga wa ngano na mahindi ambao ndani yake kuna kirutubishi cha pholic “ - Afisa Ustawi wa Jamii wizara ya Afya Bw. Denis Komba

Baadhi ya Wakina mama waliopatiwa elimu hiyo wameeleza namna watakavyoitumia kwao na watoto wao.

“Kwa sasa wizara imejitahidi imeleta vyakula vyenye virutubishi unga wa ngano , unga wa mahindi , mafuta na chumvi “-Mnufaika mafunzo ya lishe Bi. Nuru Hamidu

“ Tumefundishwa kuchanganya vitu vingi kwa lishe ya mtoto siyo vizuri kwani inasababisha mtoto kuwa na udumavu , haina haja tena ya kuchanganya vyakula kundi moja kwa lishe ya mtoto” -Mnufaika Mafunzo ya Lishe Bi. Restuta  Juvenalus