Mhe. Mtaka Afurahishwa na Maono ya Waziri wa Madini na Maendeleo ya Migodi wa Zambia

Imetumwa : June 30th, 2022

Mkuu wa Mkoa wa Dodoma, Mhe. Anthony Mtaka, ameonyesha kufurahishwa na maono ya Waziri wa Madini na Maendeleo ya Migodi wa Jamhuri ya Zambia Mhe. Paul Kabuswe.

Mhe. Paul Kabuswe akiwa ameambatana na ujumbe wake wametembelea ofisini kwa Mkuu wa Mkoa wa Dodoma kwa mazungumzo mafupi.

Akiwa ofisi kwa Mkuu wa Mkoa, Mhe. Paul Kabuswe amesema yeye pamoja na ujumbe wake wamejifunza mambo mengi yanayofanyika katika kusimamia na kuendeleza sekta ya madini nchini Tanzania. Amemweleza Mkuu wa Mkoa kwamba, katika ziara hiyo wamefanikiwa kutembelea mgodi wa wachimbaji wadogo wa madini ya dhahabu wa Nholi uliopo wilaya ya Bahi mkoani Dodoma kwa lengo la kujifunza namna Tanzania ilivyofanikiwa kupiga hatua kwenye sekta ya Madini hususan kwenye usimamizi wa wachimbaji wadogo wa madini ya dhahabu.

Aidha, Waziri Kabuswe amemweleza Mhe. Mtaka kuwa,Tanzania wamepiga hatua kubwa hususan kwenye teknolojia ya uchimbaji mdogo wa madini ambapo ameahidi kurudi tena nchini Tanzania kwa lengo la kujifunza zaidi mnyororo mzima wa shughuli za madini.

” Tukiwa viongozi tumepewa dhamana hivyo ni lazima tufanye mapinduzi ya kiuchumi,kama viongozi wetu waliotangualia walivyopambana kufanya mapinduzi na kuhakikisha tunapata uhuru basi sisi viongozi wa sasa ni lazima tupambane kuhakikisha tunaleta ukombozi wa kiuchumi, ni vyema nchi zote za Afrika zikaungana na kufanya kazi kwa ushirikiano”. Amesisitiza Mhe. Kabuswe.

Akimshukuru kwa kumtembelea ofisi kwake,Mkuu wa Mkoa wa Dodoma Mhe.Mtaka amempongeza Waziri Kabuswe kwa uamuzi wa kuja kujifunza shughuli za biashara nzima za madini nchini Tanzania.

“Nichukue nafasi hii kukupongeza sana Mhe. Kabuswe, kwani ni viongozi wachache sana wenye maono kama yako.Ingekuwa vyema kama nchi zote 54 za Afrika zingekuwa na mawaziri wenye maono kama yako.Wewe ni wa tofauti kabisa na Zambia wamebarikiwa sana kuwa na Waziri wa aina yako”.

Waziri Kabuswe ameongozana na Katibu Mkuu wa Wizara ya Madini na Maendeleo ya Migodi- Bw. Sakwiba Musiwa, Bi. Pamela Nakombe- Afisa Mipango Mkuu na Mhe. Elite.L. Mhone - Mhandisi Migodi Mwandamizi. 

MWISHO