MRADI WA MAJI PWAGA KUNUFAISHA WANANCHI 13,971 MPWAPWA

Imetumwa : November 7th, 2024

Na. Hellen M. Minja,

       Habari - DODOMA RS

Mkuu wa Mkoa wa Dodoma Mhe. Rosemary S. Senyamule amekabidhi gari kwa Meneja wa Wakala wa usambazaji maji na Usafi wa Mazingira Vijiji (RUWASA) Wilaya ya Mpwapwa itakayotumika kurahisisha usimamizi na ufuatiliaji wa miradi ya Maji inayotekelezwa ndani ya Halmashauri hiyo kutokana na ubovu wa gari iliyokuwepo awali.

Aidha, baada ya makabidhiano hayo, Mhe. Senyamule alikwenda kukagua Mradi wa usambazaji huduma ya maji katika Vijiji vya Pwaga, Mingowi, itende na Maswala unaogharimu shilingi 4,302,281,669.70 fedha kutoka mfuko wa maji wa Taifa ukiwa na lengo la kutatua changamoto ya upatikanaji wa Maji safi katika Kata ya Pwaga na kuimarisha Usafi wa Mazingira.

Mradi huo unahusisha ujenzi wa matenki  mawili moja kubwa likiwa na uwezo wa kubeba lita 500,000 na dogo likibeba lita 50,000 ukitekelezwa na Mkandarasi kutoka kampuni ya MS Pioneer Building Ltd. ya Jijini Dar es salaam ambapo Mradi umefikia asilimia 63 ya utekelezaji wake.

Kukamalika kwa Mradi kunatarajiwa kunufaisha wananchi takriban 13,971 wa Vijiji hivyo kwani kwa sasa kuna mahitaji ya lita 18,450 na Mradi utakua na vituo 30 na Milambo 6. Msimamizi Mkuu wa Mradi ni Ofisi ya Meneja wa RUWASA Mkoa na Wilaya.

#kurayakosautiyako

#ujanjanikupigakura

#dodomatupotayarikupigakura

#mtiwangubirthdayyangu