SERIKALI KUKAMILISHA MRADI MKUBWA WA KUONDOA SUMU KUVU

Imetumwa : June 17th, 2023

Mkuu wa Mkoa wa Dodoma, Mhe. Rosemary Senyamule amesema Serikali inatekeleza mradi mkubwa wa kukausha mazao na kupambana na sumukuvu katika Mji Mdogo wa Kibaigwa wenye gharama ya Shilingi ya Bilioni 18.

Senyamule ameyasema hayo leo 17/06/2023 Wilayani Kongwa wakati wa siku ya tatu ya ziara ya Katibu Mkuu wa CCM Bw. Daniel Chongolo.

Amesema kuwa kukamilika kwa mradi huo kutaongeza thamani ya mazao ya wakulima katika mji huo hivyo kuwapa uhakika wa kuuza mazao yao ndani na nje ya nchi.

Amesema Serikali inakamilisha mradi huo mkubwa na wa aina yake Afrika chini ya Wizara ya kilimo ili kuondoa sumu kuvu katika mazao ili kuimarisha uhifadhi wa mazao hayo kwa muda mrefu.

Senyemule pia amesema katika kuimarisha uchumi wa wakazi wa Kibaigwa, Serikali inaendelea na ujenzi wa barabara kwa kiwango cha lami katika ya Dodoma, Arusha na nchi jirani ili kuimarisha biashara.

Akiwa Wilayani Kongwa Katibu Mkuu wa CCM Bw. Daniel Chongolo amesema azma ya Chama kilichounda Serikali ni kuhakikisha kinaleta maendeleo kwa wananchi.

Aidha, akiwa eneo la Mtanana Chongolo amesema Serikali itatua changamoto ya mgogoro wa ardhi katika eneo hilo na kuhakikisha maji yanapatikana mapema ili kuondoa changamoto hiyo.

Bw. Chongolo yuko Mkoani Dodoma kwa ziara ya kikazi ya kukagua utekelezaji wa Miradi ya maendeleo, hii leo yuko Kongwa.