VIJANA - KONGWA WAASWA KUACHANA NA KAMALI

Imetumwa : December 12th, 2023

 Mkuu wa Mkoa wa Dodoma Mhe.Rosemary Senyamule Disemba 12,2023 amefanya ziara ya kikazi ya kukagua miradi ya maendeleo inayoendelea kutekelezwa ndani ya Wilaya ya Kongwa pamoja na kusikiliza Changamoto, kero na maoni ya Wananchi wa Wilaya hiyo.

Akizungumza na Wananchi wa Kata ya Kibaigwa Mhe. Senyamule amewakemea vikali Vijana wanaocheza michezo ya kamali (DUBWI) kuhakikisha wanafuata taratibu na sheria za mchezo huo kwa kuzingatia umri usiopungua miaka 18.

" Watendaji wa Kata na Vijiji hakikisheni mnawafuatilia wamiliki wa mabanda hayo ya kamali na wanazingatia muda wa kufungua husika kwa kuzingatia taratibu na sheria za mchezo huo ili kuondoa na kuepukana na vijana wanajiingiza katika michezo hiyo kabla ya umri uliowekwa na Serikali ili kuepusha athari mbalimbali," ameeleza Senyamule

Katika ziara hiyo Mhe.Senyamule amefanikiwa kukagua Jengo jipya la Halmashauri hiyo linalojengwa kwa garama ya zaidi ya Shillingi Bilioni 2.8 fedha kutoka Serikali Kuu,ametembelea na kuona utoaji huduma katika Soko la Mazao mbalimbali Kibaigwa pamoja na mradi wa mtaro wa maji taka wenye urefu wa mita 2500 katika barabara ya Kibaigwa Sokoni.

Licha ya kukagua na kutembelea miradi mbalimbali Mhe. Senyamule alipata fursa ya kusikiliza na kutatua kero na malalamiko mbalimbali ya wananchi wa kata kibaigwa ambapo jumla ya kero 48 zilipatiwa ufumbuzi kutoka kwa wataalamu mbalimbali wa ngazi ya Mkoa alioambatana nao.

Hata hivyo Mkurugenzi mtendaji wa Wilaya ya Kongwa Dkt. Omary Nkullo ameahidi kuendelea kutatua kero mbalimbalim za wakazi wa wilaya hiyo pia kuendelea kusimamia utekelezaji wa miradi ya maendeleo kwa ubora na ufasaha unaotakiwa.