WAWEKEZAJI KUTOKA NCHINI DENMARK WAITWA DODOMA

Imetumwa : June 9th, 2025

Na. Hellen M. Minja

       Habari – DODOMA RS

Waziri wa Mambo ya Nje na Ushirikiano wa Afrika Mashariki Mhe. Balozi Mahmoud Thabit Kombo ametoa wito kwa Wawekezaji kutoka Denmark kuongeza uwekezaji wao katika sekta za afya, kilimo, viwanda, utalii, nishati safi pamoja na kujenga ofisi zao Jijini Dodoma ili kuimarisha ushirikiano wake na Tanzania.

Balozi Kombo ametoa wito huo alipowaongoza Watanzania na Wanadiplomasia katika Maadhimisho ya Siku ya  Katiba ya Denmark yaliyofanyika katika Makazi ya Balozi wa Nchi hiyo Jijini Dar es Salaam Juni 05, 2025.

Wito huo umekuja baada ya kufanyika kwa ziara ya Mabalozi (Capital City Diplomatic Tour) Jijini Dodoma iliyoandaliwa na Ofisi ya Mkuu wa  Mkoa  kwa kushirikiana na Wizara ya mambo ya Nje na Ushirikiano wa Afrika Mashariki,Wizara ya Mali Asili na Utalii,Wakala wa  Barabara Nchini (TANROADS) pamoja na Hospitali ya Benjamini Mkapa ambapo Mabalozi hao walitembelea Hospitali ya Benjamini Mkapa,Mji wa Serikali Mtumba na Kiwanja cha Ndege cha Kimataifa cha Msalato.

Awali, Balozi wa Denmark hapa nchini, Mhe. Jesper Kammersgaard, aliipongeza Tanzania kwa mafanikio makubwa iliyoyapata katika nyanja za kiuchumi, miundombinu na maendeleo ya kijamii huku akiongeza kuwa, mafanikio hayo yameihamasisha Nchi yake kuendelea kuimarisha uhusiano wake wa kirafiki na kindugu na Tanzania.

Siku ya Katiba ya Denmark huadhimishwa Juni 05 ya kila mwaka kukumbuka kupitishwa kwa Katiba ya kwanza ya kidemokrasia ya Nchi hiyo mwaka 1849 na huheshimiwa kama siku ya kidemokrasia ya Taifa hilo.

#capitalcitydiplomatictour

#takedodomatotheworld

#bringtheworldtododoma

#dodomawerereadyforyou