DODOMA KUONDOKANA NA UKAME KUTOKANA NA UWEKEZAJI KATIKA MIRADI MIKUBWA YA UMWAGILIAJI

Imetumwa : July 13th, 2025

Na. Hellen M. Minja

       Habari – DODOMA RS

Serikali ya awamu ya sita chini ya Rais Mhe. Dkt. Samia, imekuja na Mkakati wa kukuza Kilimo ambapo imewekeza katika Miradi mikubwa ya umwagiliaji kwenye Mkoa wa Dodoma na kuuondoa kwenye dhana ya ukame ambapo sasa kilimo cha umwagiliaji kinakwenda kuchukua nafasi na kuleta uhakika wa chakula wakati wote.

Hayo yamesemwa na Mkuu wa Mkoa wa Dodoma Mhe. Rosemary Senyamule alipohudhuria hafla ya uzinduzi wa miradi mbalimbali ya maendeleo sambamba na Ibada ya Kipaimara katika kanisa la Kianglikana Parishi ya Mwitikira katika Wilaya ya Bahi Julai 13, 2025.

“Mhe. Rais amekuja na mkakati mkubwa kabisa wa kukuza kilimo kwenye nchi yetu na sisi Mkoa wa Dodoma tumekua wa kwanza kupata miradi mikubwa ya kilimo ambayo imetufanya tuseme kumbe Dodoma sio kame kinachotakiwa ni maarifa. Maeneo mbalimbali yanachimbwa Mabwawa ikiwemo Bahi ambalo litamwagilia Heka 600”.

Aidha, Askofu wa Dayosisi ya Tanganyika ya Kati Rt. Rev. Dr. Dickson Chilongani (PhD), akiwa kwenye ibada ya wanafunzi wa Kipaimara, amewaasa wakazi wa eneo hilo kuachana na kilimo kinachohitaji mvua nyingi badala yake wajikite kwenye mazao yanayostahimili ukame huku wakijishughulisha na ujasiriamali wakati msimu wa kilimo unapokwisha.

Hata hivyo, Mhe. Senyamule amezindua miradi kadhaa iliyotekelezwa na Kanisa hilo kwa ufadhili wa Kanisa la St. Paul’s Richmond la nchini Marekani ikiwemo kisima cha maji ya kunywa chenye urefu wa Mita 50 kwenda chini kikiwa na uwezo wa kutoa maji lita 19,000 yatakayotumiwa na wakazi wa Kijiji hicho huku kikigharimu kiasi cha shilingi 75,484,558.

Mradi mwingine uliozinduliwa ni madarasa 9 na ofisi 1 ya Walimu katika shule ya msingi Mwitikira ambayo yamefanyiwa ukarabati wa kuwekwa sakafu, kupaka rangi, kupaua, kuweka madirisha ya chuma kwenye jengo la ofisi ya Walimu, kujenga varanda jengo la utawala ambapo ukarabati huo umegharimu kiasi cha shilingi 19,000,000.

Vile vile, Mradi wa shamba darasa la kilimo cha umwagiliaji ambao unalenga kuwafundisha wakazi hao kilimo cha mboga mboga pamoja na ujasiriamali umezinduliwa ukigharimu shilingi 16,356,000 wakati zoezi la utoaji matibabu bila gharama likiendelea kwa wakazi hao na wale wa vijiji vya jirani tangu Julai 10 ambapo mpaka leo wamehudumia jumla ya wagonjwa 660.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu