DODOMA YAADHIMISHA SIKU YA UTALII DUNIANI KWENYE MICHORO YA MIAMBANI KONDOA

Imetumwa : September 27th, 2025

Na; Happiness E. Chindiye

     Habari - Dodoma RS

 Ofisi ya Mkuu wa Mkoa wa Dodoma kwa kushirikiana na Tanzania Forest Services (TFS) na EPIC Nyama Choma wameadhimisha Siku ya Utalii Duniani Septemba 27, katika eneo la kihistoria la michoro ya miambani ya Kondoa (Kondoa Rock Art).

Katika maadhimisho hayo, washiriki walipata fursa ya kujifunza historia na thamani kubwa ya michoro hiyo ya miambani ambayo imetambuliwa na Shirika la Umoja wa Mataifa la Elimu, Sayansi na Utamaduni (UNESCO) kama urithi wa dunia.

Akizungumza kwa niaba ya Mkuu wa Mkoa, Katibu Tawala Wilaya ya Kondoa Bi. Christina Kalezi alitoa salamu na pongezi kwa Ofisi ya Mkuu wa Mkoa pamoja na Wadau hao  kwa juhudi zao za kuendeleza na kutangaza vivutio vya utalii vilivyopo mkoani Dodoma.

“Ninawapongeza kwa kushirikiana kuadhimisha siku hii muhimu katika eneo la kipekee duniani. Michoro ya miambani ya Kondoa ni urithi wa dunia unaotambulisha historia yetu, hivyo ni wajibu wetu sote kuutunza na kuutangaza kwa vizazi vya sasa na vijavyo,” - Amesema  Bi. Christina.

Aidha, amewahimiza washiriki na wadau wa utalii kuendelea kuwa mabalozi wazuri wa vivutio vya kitalii vilivyopo, hususani Mkoa wa Dodoma na Tanzania kwa ujumla.

“Nawasihi kila mmoja awe balozi wa utalii, si kwa wageni wa nje pekee bali hata kwa ndugu na marafiki wa ndani ya Nchi. Utalii wa ndani ukikuzwa vizuri, una nafasi kubwa ya kuchochea uchumi wa jamii na Taifa Letu,” aliongeza.

Hata hivyo ameeleza kuwa  utalii wa kiutamaduni na kihistoria ni nyenzo muhimu ya kukuza uchumi wa jamii na Taifa, hivyo kuna wajibu wa kuvilinda, kuvitunza na kuvitangaza vivutio hivyo.

Maadhimisho hayo yalihudhuriwa na Watumishi wa Ofisi ya Mkuu wa Mkoa wa Dodoma, wadau mbalimbali wa utalii, vijana, pamoja na wanajamii,waliojionea uzuri na upekee wa urithi wa historia ya binadamu uliohifadhiwa katika michoro hiyo ya miambani.

&&&

#dodomafahariyawatanzania

#keroyakowajibuwangu

#nimejiandikishanitapigakura