ELIMU NI SILAHA MUHIMU KATIKA VITA DHIDI YA DAWA ZA KULEVYA NCHINI

Imetumwa : June 24th, 2025

Na. Hellen M. Minja

       Habari – DODOMA RS

Imeelezwa kuwa Elimu ni silaha muhimu katika vita dhidi ya dawa za kulevya, kwani uelewa unahitajika kuhusu madhara ya matumizi na biashara ya dawa hizo, njia za kukabiliana na uraibu na jinsi ya kupata msaada.

Hayo yameelezwa na Mkuu wa Mkoa wa Dodoma Mhe. Rosemary Senyamule Juni 24, 2025 alipokua akifungua rasmi maonesho kuelekea kilele cha maadhimisho ya   Kitaifa ya Siku ya Kupiga Vita Dawa za Kulevya Duniani, ambapo alifanya Mkutano na Waandishi wa Habari kuutangazia Umma juu ya maadhimisho hayo yanayofanyika kwenye  viwanja vya Jakaya Kikwete Jijini humu.

“Elimu ni silaha kubwa katika vita dhidi ya dawa za kulevya. Kupitia maonesho haya, wananchi watapata uelewa bora kuhusu madhara ya matumizi ya dawa za kulevya, njia za kukabiliana na uraibu na jinsi ya kupata msaada”.

Kadhalika, Mhe. Senyamule amesema kuwa maadhimisho hayo yanalenga kupaza sauti kwa Umma juu ya madhara ya dawa za kulevya, hatua zilizofikiwa na mipango endelevu ya Serikali katika kudhibiti na kupambana na tatizo hilo huku yakiambatana na shughuli mbalimbali za udhibiti kutoka kwa Wadau wanaoshiriki katika mapambano hayo.

Aidha, ameongeza kuwa, Dawa za Kulevya ni janga linaloathiri familia nyingi Nchini hivyo, ni muhimu kwa Wananchi kushiriki katika maonesho hayo ili kupata elimu kufahamu njia za kukabiliana na tatizo hilo sambamba na kuwasaidia waliothiriwa na dawa hizo.

Mwezi Juni kila mwaka, Dunia huadhimisha siku ya Kupiga vita dawa za kulevya, Maadhimisho ambayo hufanyika kwa siku tatu mfululizo (24, 25 na 26) na mwaka huu yanafanyika Mkoani hapa katika kituo cha Mikutano cha Jakaya Kikwete ambapo Mgeni rasmi anatarajiwa kuwa Rais wa Jamhuri ya Muungano wa Tanzania, Mhe. Dkt. Samia Suluhu Hassan.

#drugday

#wekezakwenyekinganatibadhidiyadawazakulevya