ELIMU YATOLEWA JUU YA UNYANYAPAA KWA WAGONGWA WA KIFUA KIKUU

Imetumwa : February 12th, 2025

Na. Hellen M. Minja,

       Habari – DODOMA RS

Jamii imetakiwa kufahamu kwa undani namna ugonjwa wa Kifua Kikuu unavyoenezwa ili kusaidia kuepuka unyanyapaa kwa wagonjwa wa Kifua Kikuu hali ambayo itachagiza mapambano ya kumaliza ugonjwa huo kwa haraka kama malengo ya Serikali yanavyoeleza.

Hayo yameelezwa kwenye kikao kilichowahusisha Maafisa Watendaji wa Kata, Wenyeviti wa Mitaa, viongozi wa madhehebu ya dini na wadau wanaoshirikiana na Serikali katika mapambano dhidi ya Kifua Kikuu kikilenga kuwaelimisha juu ya unyanyapaa kwa wagonjwa katika ukumbi wa ofisi za Zimamoto, Jijini Dodoma leo Februari 12, 2025.

Akielezea umuhimu wa jamii kufahamu hayo, Mratibu wa Kifua Kikuu na Ukoma kutoka Ofisi ya Mkuu wa Mkoa wa Dodoma Dr. Peres Lukango amewaambia viongozi hao kuwa wanatakiwa kuhakikisha jamii wanayoilea kiutawala au kiimani inafahamu Kifua Kikuu, madhara yake na inajua kuhusu unyanyapaa na namna ya kuuepuka.

Kadhalika, Mratibu wa Kifua Kikuu na Ukoma kwa Jiji la Dodoma Dr. Rahma Mohamed amesema;

“Leo tumekutana na viongozi hawa ili kuwajengea uwezo na kupata uelewa kuhusu unyanyapaa na waweze kutusaidia kwenye mapambano ya kudhibiti Kifua Kikuu kwani viongozi hawa ndio wanaokutana na jamii kwa ukubwa hivyo watatusaidia kutambua kwa haraka dalili za awali kwa wagonjwa na kutoa taarifa kwenye vituo husika”.

Hatahivyo, Afisa Uhamasishaji na Utetezi Bi. Enel J. Tarimo, kutoka Tanzania TB Community Network (TTCN) ambao ni Mdau anayeshirikiana na Serikali katika mapambano dhidi ya Kifua Kikuu amesema;

“Kifua Kikuu Nchini bado ni janga ambalo linapoteza watu wengi na tunapokea takwimu kubwa kila siku kwa wagonjwa wa Kifua Kikuu na wanaoathirika kuripoti changamoto kubwa ya unyanyapaa kwenye jamii zao hivyo tuliona ni vyema kuwaunganisha wenye jamii wenyewe ili kuielewesha juu ya Kifua Kikuu.”

Haya yote bado ni muendelezo wa Mpango wa kuibua wagonjwa wenye vimelea vya ugonjwa wa Kifua Kikuu kwenye Mkoa wa Dodoma ambapo lengo ni kuibua wagojwa 1,930 ambao hawakuonekana mwaka 2024 ili kufikia malengo ya nchi kumaliza kabisa ugonjwa huo ifikapo 2030.

#dodomafahariyawatanzania

#keroyakowajibuwangu

#mtiwangubirthdayyangu