HALMASHAURI ZA DODOMA ZATAKIWA KUYAENZI MAENEO YA MICHEZO

Imetumwa : September 20th, 2025

Na. Sizah Kangalawe

Dodoma RS

Mkuu wa Mkoa wa Dodoma, Mhe. Rosemary Senyamule, amezitaka halmashauri za Mkoa huu kuhakikisha maeneo yaliyotengwa kwa ajili ya  michezo yanaendelezwa na kutunzwa ipasavyo.

Maagizo hayo yametolewa Septemba 20, 2025 katika Viwanja vya Jamhuri Jijini Dodoma, wakati wa Bonanza la msimu wa pili la Dodoma Fitness lililoandaliwa kwa ushirikiano na Umoja wa 'One Strong Family'.

"Sisi kama Mkoa, katika kuimarisha michezo, tumeendelea kutenga maeneo ya michezo. Na niendelee kuagiza wilaya zote za Mkoa wa Dodoma na maeneo mengine, tuhakikishe maeneo yaliyotengwa kwa ajili ya michezo yanalindwa, yanatunzwa na yanaheshimiwa bila kuingiliwa, ili kila eneo liweze kufaidika na faida zote za michezo," ameagiza Mhe. Senyamule.

Kwa upande wake, Mkuu wa Wilaya ya Dodoma, Mhe. Jabir Shekimweri, amesema bonanza hilo limetumika pia kama fursa ya kutembelea vivutio mbalimbali vya utalii vilivyopo mkoani humu.

"Wilaya ya Dodoma kwa kushirikiana na Dodoma 'Fitness Club' tumeona bonanza la mwaka huu lifanyike kwa utofauti. Baada ya kukimbia km 6.8, tutakuwa pia na ratiba ya kufanya utalii wa ndani katika makao makuu ya nchi," amesema Shekimweri.

Naye Makamu Mwenyekiti wa Dodoma Fitness, Bi. Tatu Rajab, amesema wataendelea kuwa mabalozi wazuri wa vivutio vya utalii mkoani hapo na kwamba bonanza hilo litaendelea kufanyika kila mwaka.

Bonanza hilo limehusisha vikundi mbalimbali vya jogging kutoka mikoa tofauti Nchini kupitia umoja wao ujulikanao kama 'One Strong Family'. Hii ni mara ya pili kufanyika tangu kuanzishwa kwa umoja huo.

Awali, washiriki walikimbia  mbio pole  'jogging' ambazo zilianzia Viwanja vya Jamhuri, kupitia barabara ya Iringa, barabara  ya mzunguko ya Magorofani na kumalizikia tena katika Viwanja vya Jamuhuri, kwa umbali wa kilomita 6.8.