KAMISHNA JENERALI DCEA AMTEMBELEA RC SENYAMULE

Imetumwa : January 24th, 2025

Na. Sizah Kangalawe

Habari -Dodoma RS

 Rosemary Senyamule ametembelewa Ofisini kwake na Kamishna Jenerali  wa mamlaka ya kudhibiti na kupambana na Dawa za Kulevya Bw. Aretas J. Lyimo, aliyefika Ofisini hapo Januari 24, 2025 kwa lengo la kupanga mikakati ya  maandalizi ya maadhimisho ya kupinga matumizi ya dawa za kulevya yanayoyotarajiwa kufanyika Mwezi Juni Mwaka huu katika viwanja vya Jamuhuri Jijini Dodoma,ambapo Mgeni Rasmi anatarajiwa kuwa Rais wa Jamhuri ya Muungano wa Tanzania Mhe. Dkt Samia Suluhu Hassan.

Kamishina Lyimo amefika ofisini hapo akiambatana na watumishi wengine wa  Mamlaka hiyo ambao ni D.M. Dominic, Bi. Veronica Matikila, Dr. Peter Mfisi pamoja na  Wakili  Joseph P. Kisusi.

 Hata hivyo kupitia kikao hicho zimejadiliwa  namna na njia mbalimbali za kukabiliana na changamoto ya dawa za kulevya Nchini ili kuwaepusha vijana na watumiaji wengine na janga hilo linalosababisha  kupungua kwa nguvu kazi ya Taifa.

Maadhimisho hayo yaliyoanza kuadhimishwa tangu Mwaka 1987, yanatarajiwa kufanyika kwa siku tatu  Mkoani hapa huku yakiwa na dhamira ya kutokomeza Matumizi ya dawa za Kulevya Nchini pamoja na kuunganisha nguvu za mataifa mbalimbali juu ya kutokomeza dawa hizo.