KIWANDA CHA NONDO KINACHOTUMIA UMEME JUA KUJENGWA CHAMWINO MKOANI DODOMA

Imetumwa : June 13th, 2025

Na. Hellen M. Minja

       Habari – DODOMA RS

Kiwanda cha uzalishaji wa nondo kinachotumia kiwango kikubwa cha umeme jua (Solar Energy), kinatarajiwa kujengwa katika eneo la Chinangali II, Wilaya ya Chamwino Mkoani Dodoma ambapo kitakua kiwanda kikubwa barani Afrika kutumia nishati hiyo kwa uzalishaji.

Wawekezaji wa kiwanda hicho kutoka nchini China, wamefika kwenye ofisi ya Mkuu wa Mkoa wa Dodoma Mhe. Rosemary Senyamule Jijini Dodoma leo Juni 13, 2025 kutambulisha dhamira yao ambapo Mkuu wa Mkoa amewakaribisha na kuwashukuru kwa kuchagua kuwekeza Dodoma kwani ni sehemu sahihi yenye huduma zote muhimu zinazopatikana mahali pengine popote.

 “Nimefarijika kuona jinsi Dodoma inavyoendelea kupata wawekezaji kutoka Nchi mbalimbali kwani ndio kipaumbele chetu. Niwakaribishe sana muifaharishe Dodoma ambayo ni makao makuu ya Nchi, hivi karibuni tulifanya ziara ya Mabalozi na tumewaonesha huduma zinazopatikana hapa na kuwaambia watuletee wawekezaji kwani ni sehemu sahihi na inayojitosheleza”. Mhe. Senyamule.

Wawekezaji hao ambao ni wabobezi katika uzalishaji wa bidhaa kwa kutumia nishati hiyo nchini China kwani wanashika nafasi ya 10 kwa ubora wa viwanda vinavyotumia umeme jua nchini mwao, wameshaingia ubia na mwekezaji mzawa anayejulikana kama ‘Siwaye Trading Company’ anayepatikana eneo la Chinangali II katika Wilaya ya Chamwino ambapo nao wameomba kupatiwa eneo hapo.  

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu