MHE.RAIS ANALETA SHULE ILI WATOTO WASITEMBEE UMBALI MREFU ; RC SENYAMULE

Imetumwa : December 13th, 2024

Na. Hellen M. Minja,

       Habari – DODOMA RS

Ikiwa ni siku chache zimesalia kuanza muhula mpya wa masomo Nchini mnamo Januari 13, 2025, Mkuu wa Mkoa wa Dodoma Mhe. Rosemary Senyamule, amefanya ziara ya kikazi kutembelea miradi ya ujenzi wa shule ya Sekondari ya Kata ya Matumbulu pamoja na ujenzi wa madarasa katika shule ya Sekondari Kata ya Miyuji B zote za Jijini Dodoma.

 Ziara hiyo imelenga kukagua maendeleo ya ujenzi wa shule na madarasa hayo ili kujihakikishia kuwa wanafunzi wote waliochaguliwa kuanza kidato cha kwanza 2025, wataweza kuanza masomo yao bila adha ya kutembea umbali mrefu pamoja na kupunguza msongamano madarasani.

“Matamanio ya Rais kuleta hizi shule ni ili watoto wasitembee mwendo mrefu kwenda shule, bado tuna changamoto ya utoro inayochangiwa na watoto kutembea mwendo mrefu lakini pia tuna ukatili wa kijinsia ambao hufanyika watoto wakiwa wanaelekea shuleni, yote haya Mhe. Rais ametaka ayamalize kwa kuwajengea shule karibu na maeneo yao” Amesema Mhe. Senyamule.

Aidha, Katibu Tawala Wilaya ya Dodoma Bi. Sakina Mbugi, amesema kuwa, Mhe. Rais ametoa fedha ili kuboresha mazingira ya kujifunza na kujifunzia kwa wananchi wa Mkoa wa Dodoma ili kupigana na adui ujinga hivyo, wao kama Wataalamu wanapaswa kuwa mstari wa mbele kuhakikisha miradi hiyo inakamilika kwa wakati uliokusudiwa.

Mradi wa Shule mpya ya Sekondari Kata ya Matumbulu ulitengewa kiasi cha shilingi 544,225,526 kwa ujenzi wa madarasa 8, ofisi 2, jengo la Utawala, maabara za Fizikia, Baiolojia na Kemia, jengo la TEHAMA, choo, kichomea taka na tanki la maji la ardhini. Ujenzi umefikia hatua ya pili ya kuezeka.

Katika shule ya Sekondari Kata ya Miyuji B inayotekeleza mradi wa ujenzi wa miundombinu ya nyumba 2 za walimu, mabweni 2, matundu 10 ya vyoo na madarasa 4 kwa kiasi cha shilingi 454,000,000 kutoka katika mradi wa SEQUIP unaohusika na kuboresha miundombinu ya elimu, umefikia hatua ya kuezeka ambapo miradi yote hiyo inatarajiwa kukamilika Disemba 30, 2024.

#dodomafahariyawatanzania

#keroyakowajibuwangu                              

#mtiwangubirthdayyangu