MRADI WA ‘YEFFA’ MKOA WA DODOMA WAIBUA VIJANA WANUFAIKA 84,590 MKOA WA DODOMA

Imetumwa : June 4th, 2025

Na. Hellen M. Minja

       Habari – DODOMA RS

Vijana 84,590 wameibuliwa kutoka kwenye Mradi wa ‘Youth Entrepreneurship for the Future of Food and Agriculture (YEFFA)’ wenye lengo la kuibua fursa za kilimo kwa vijana wa Mkoa wa Dodoma ulioanzishwa na Taasisi ya ‘Voice of Youth Tanzania’ (VOYOTA) katika kipindi cha mwaka mmoja (2024 – 2025) wa utekelezaji wake.

Hayo yamebainishwa na Katibu Tawala Mkoa wa Dodoma Bw. Kaspar K. Mmuya alipokua akifungua kikao kazi cha Taasisi hiyo na wadau wanaofanyanao kazi katika kutimiza malengo ya Mradi kilichofanyika kwenye ukumbi wa ofisi ya Mkuu wa Mkoa wa Dodoma Jijini humu leo Juni 04, 2025.

“Hii Taasisi wametueleza hapa lengo lao ni vijana nyinyi muibue fursa zilizopo kwenye kilimo. Kwanza alitengeneza ‘profile’ ili kufahamu wakulima katika kundi hili wako wangapi? Nimeambiwa ni 84,590 mmewaibua kutokea mwaka jana mwezi wa saba mradi ulipozinduliwa na mmewawekea malengo katika mwezi wasipungue vijana 2500.”

Kadhalika, Meneja Mradi wa YEFFA kutoka VOYOTA Bw. Andrew Buhuba amesema Mradi huo umetoa kipaumbele zaidi kwa wanawake takribani 80% waweze kunufaika na mradi unatekelezwa kwenye Mikoa sita ikiwemo Dodoma na wanaendelea na mradi kwa miaka mingine mitatu.

Meneja huyo ameongeza kuwa, wameingia makubaliano na wakulima viongozi na kuangalia namna wanavyoweza kufikia malengo ya kuwafikia vijana wengi zaidi kwa Mkoa wa Dodoma hususan katika Wilaya za Chamwino na Dodoma na leo wamekutana na viongozi wao kuangalia namna wanavyoweza kutatua changamoto zinazojitokeza.

Mradi wa 'YEFFA' unatekelezwa chini ya ufadhili wa 'AGRA' ambapo hufanya kazi kwa kuwaingiza wakulima kwenye kanzi data inayowawezesha kunufaika na fursa mbalimbali zinazozunguka Mradi huo kutokana na Mradi kuwa na Wadau wengi na unashughulika na vijana wenye umri kuanzia miaka 15 hadi 35.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu