RAS DKT. KAZUNGU AWATAKA WATUMISHI WA SERIKALI KUFANYA KAZI KWA WELEDI , JUHUDI NA MAARIFA

Imetumwa : September 15th, 2025

_Amesisitiza mshikamano, utiifu wa sheria na taratibu za utumishi

_Ameshukuru kwa mapokezi mazuri kutoka kwa watumishi

Na; Happiness E. Chindiye

 Habari - Dodoma RS

Katibu Tawala wa Mkoa wa Dodoma, Dkt. Khatibu Kazungu, amewataka watumishi wa Serikali kufanya kazi kwa weledi, juhudi na maarifa, huku wakizingatia sheria, kanuni, taratibu na miongozo ya utumishi wa umma.

Dkt. Kazungu ametoa wito huo mara baada ya kuwasili katika Wilaya za Mpwapwa na Kongwa, katika ziara yake aliyoianza yenye lengo la kujitambulisha kwa watumishi, kusikiliza changamoto zao na kutoa ufumbuzi wa kero mbalimbali. Mapema leo Semptemba 15,2025.

“Tuendelee kufanya kazi kwa weledi, juhudi na maarifa tukizingatia sheria, kanuni, taratibu pamoja na miongozo yote inayotolewa na viongozi wetu,” alielekeza Dkt. Kazungu.

Aidha, amesisitiza umuhimu wa watumishi kufanya kazi kwa kuzingatia Dira ya Maendeleo ya Taifa 2050, malengo ya milenia, Ilani ya Chama Tawala pamoja na mikakati ya Halmashauri za maeneo husika.

“Tunapotekeleza majukumu yetu, tuhakikishe malengo yetu yanazingatia Dira ya Taifa ya 2050 pamoja na maelekezo ya viongozi wetu,” alisema.

Dkt. Kazungu alipowasili katika wilaya hizo alipokelewa na Makatibu Tawala wa Wilaya na Wajumbe wa Kamati za Ulinzi na Usalama. Katika vikao tofauti, alizungumza na watumishi kutoka taasisi na kada mbalimbali na kufanikisha upatikanaji wa ufumbuzi wa kero zilizowasilishwa.

#DodomaFahariYaWatanzania

#KeroYakoWajibuWangu