VITUO VYA AFYA MSINGI MKOANI DODOMA VYAONGOZA MATUMIZI YA MFUMO WA ‘ GoTHOMIS’ KWA 98%

Imetumwa : June 12th, 2025

Na. Hellen M. Minja

       Habari – DODOMA RS

Mkoa wa Dodoma unatajwa kuongoza kwa asilimia 98 ya matumizi ya Mfumo wa Serikali wa utoaji huduma za Afya (GoTHOMIS) kwenye vituo vyote vya afya msingi vilivyosimikwa Mfumo huo kwa ufadhili wa Shirika la KOICA kutoka Serikali ya Muungano wa Korea kwa ushirikiano na Serikali ya Muungano wa Tanzania.

Hayo yamesemwa na Naibu Katibu Mkuu TAMISEMI – anayeshughulikia masuala ya Afya Prof. Tumaini Nagu wakati akifungua kikao kazi cha tathmini ya Matumizi ya Mfumo huo katika vituo vya afya vya Mkoa wa Dodoma kilichofanyika kwenye ukumbi wa Ofisi ya Mkuu wa Mkoa huo leo Juni 12, 2025.

“Kwa ujumla 78% ya vituo vya afya msingi vimefanikiwa kusimika na kutumia Mfumo huu. Hii ni kwa wastani, lakini tukiongelea mikoa mingine ambayo ipo nyuma kama Mkoa wa Pwani wanakaribia 60% lakini wanavutwa na Mkoa wa Dodoma ambao sasa unasimamia kwenye 98%, haya ni mafanikio makubwa”.

Aidha, Mwakilishi kutoka Wizara ya Afya Dr. Gidion Mnzava amesema kupitia msaada wa KOICA, vituo vya afya 235 vimesimikwa Mfumo huo ambao unarahisisha usajili, utunzaji rekodi sambamba na uwasilishaji wake wenye ubora kwa njia ya kidijitali pia mafunzo yanayotolewa kwa watumishi juu ya matumizi ya vifaa, yamechangia kwenye utoaji wa huduma bora za afya.

Kwa upande wake, Makamu Mkurugenzi Mkaazi wa KOICA nchini Tanzania Bw. Seunghoon Beck, amewataka wadau walioahidi kukamilisha usimikaji wa vifaa vya Mfumo huo kwenye vituo vilivyosalia, kuhakikisha wanakamilisha kabla ya muda wa mradi kuisha ili huduma za afya ziweze kutolewa kwa njia za kisasa kwa kuwa Serikali yake itaendelea kudumisha ushirikiano mzuri uliopo baina ya nchi hizi mbili.

Naye Katibu Tawala Mkoa wa Dodoma Bw. Kaspar K. Mmuya, amesema Dodoma inafanya vizuri kwenye matumizi ya GoTHOMIS hivyo, kazi iliyobaki ni kwa Wakurugenzi wa Halmashauri kuunganisha Mfumo huo na ule wa Serikali ili kuboresha ufuatiliaji wa karibu kwenye ukusanyaji wa mapato kutoka katika vituo vya afya lakini pia kuweka rekodi zilizo bora.

Mradi wa usimikaji vifaa, mafunzo na matumizi ya Mfumo wa GoTHOMIS kwenye vituo vya afya unaotekelezwa na Shirika la KOICA nchini Tanzania, ulianza 2021 na unatarajiwa kukamilika ifikapo Desemba 2025, unatajwa kurahisisha upatikanaji wa huduma za afya hivyo kupunguza changamoto mbalimbali ikiwemo upotevu wa taarifa za wagonjwa.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu