WANAWAKE CHANGAMKIENI FURSA - SENYAMULE

Imetumwa : March 12th, 2023

Wanawake wametakiwa kujipambanua na kuchangamkia fursa mbalimbali zinazojitokeza na kuthubutu kuzifanya kwa juhudi na maarifa ili kuepuka utegemeze kwa kila kitu.

Hayo yamesemwa na Mkuu wa mkoa wa Dodoma mhe. Rosemary Senyamule alipozungumza na wanawake wa Mkoa wa Dodoma na viunga vyake katika ukumbi wa “Dear Mama” hotel jijini Dodoma katika hafla ya mwanamke mwamba iliyoandaliwa na Cfm redio na kuhudhuriwa na wanawake wa makampuni mbalimbali.

"Hafla kama hizi zinapendeza pia kuwapa taarifa kuwa Serikali inatambua uwepo wenu na tunafanya kazi na wanawake pia, ukisikia kuna zabuni zimetangazwa na serikali changamkieni na tafuta timu yako mkafanye kazi, hata ukishika zabuni ya kuleta tofali tuu ili mradi kwenye zile 10% za ushiriki hata kwa 3% acheni kuogopa jaribuni mnaweza” Amesisitiza Mhe. Senyamule.

"Niwaongeze Cfm kwa kutambua na kuona umuhimu wa kumpa motisha mwanamke mpambanaji nimesikia redio yenu imeanzishwa juzi tu mwaka 2020 lakini mpaka sasa mmshatoa tuzo miaka mitatu mfululizo hii inamaanisha mnathamini juhudi za wanawake wa Dodoma, niwatie moyo endeleni hivi hivi mnawapa nguvu ya kuthubutu na wale waliolala kuamka na kufanya kazi" Mhe. Senyamule amebainisha.

Nae Mkuu wa Ubunifu wa Cfm redio Samwel Andrew amesema ni wakati wa wanawake kuanza kujitegemea na kufanya kazi kwa bidii ili kuienzi dhamira kuu ya kuadhimisha hafla ya mwanamke mwamba ya kutoa fursa kwa mwanamke wa Dodoma na Kanda ya kati kutambua thamani yake katika jamii.

"Ni wakati sasa wanawake kuanza kujitegemea na kuanza kufanya kazi kwa bidii ndani ya familia, hapa ni kuangazia wajibu wa mwanamke katika familia na hata jamii husika, kuhakikisha kila fursa inayotokea mwanamke asibaki nyuma na kuanza kumtegemea mwanaume kuwa atafanya, baadhi ya wanawake wamekuwa wakitegea kuwa ni lazima mwanaume awajibike kwa kila nafasi lakini si wanaume wote watakuwa na mtazamo wa kuwajibika vyema.

"Ni wakati wa wanawake wote kusema wanaweza, hii italeta mawazo chanya na mtazamo mzuri katika jamii na kuleta ushawishi mkubwa wa jamii kuanza kuamini kuwa pia hata wanawake wanaweza kuleta mabadiliko makubwa, kwa namna hii wanawake wengi watajua wajibu wao katika jamii na kuanza kuzijua fursa nyingi ndani na nje ya nchi", Amesema Bw. Andrew

Aidha katika hafla hiyo Cfm kupitia tuzo ya mwanamke mwamba wa kusaidiwa kwa kushirikiana na wadau wengine wamemkabidhi Bi. Beatrice Makenga (mlemavu wa miguu) mtaji wa friji ili aweze kufanya biashara ya kuuza 'barafu’ ambayo itamsaidia kujikimu kimaisha na familia yake pia Beatrice alikabidhiwa zawadi mbalimbali kutoka kwa wanawake miamba waliohudhuria hafla hiyo.