WATAALAMU WA ELIMU NGAZI YA HALMASHAURI WANADHAMANA YA KULETA TIJA KWA TAIFA

Imetumwa : June 4th, 2025

Na. Hellen M. Minja

       Habari – DODOMA RS

Wataalamu wa Elimu ngazi ya Halmashauri, wametajwa kupewa dhamana kubwa na Serikali katika kutumia ujuzi na maarifa waliyonayo ili yalete tija kwa Taifa, kutokana na uwekezaji mkubwa unaofanywa na Serikali ya awamu ya Sita chini ya Rais Mhe. Dkt. Samia Suluhu Hassan kwenye elimu.

Katibu Tawala Mkoa wa Dodoma Bw. Kaspar K. Mmuya, ameyasema hayo Juni 04, 2025 alipofungua kikao cha Maafisa Elimu Msingi na Sekondari kutoka Halmashauri za Mkoa wa Dodoma kilicholenga kufanya tathmini ya maandalizi ya Mashindano ya Michezo kwa Shule za Msingi (UMITASHUMTA) na shule za Sekondari (UMISSETA) ngazi ya Mkoa na Taifa sambamba na mapokezi ya wanafunzi wa kidato cha tano 2025.

“Tumetoa elimu kwa sababu ya kukupa maarifa ambayo yamekujengea ujuzi ili utoe tija kwa Taifa letu, ndio maana tunawekeza kwenye elimu. Dhamana hii tumepewa sisi, sisi ni Maafisa ambao tunasimamia sekta ya elimu kwenye ngazi ya Halmashauri ambayo kimsingi ndio Wataalamu wakuu katika ngazi ya Halmashauri”.

Aidha, Katibu Tawala Msaidizi Seksheni ya Elimu na Mafunzo ya Ufundi Mkoa wa Dodoma Mwl. Vicent Kayombo amesema mbali na ajenda hizo pia kikao hicho kitafanya tathmini ya mwenendo wa hali ya Taaluma ndani ya Mkoa baada ya ufanyaji wa kazi kwa kipindi cha miezi sita na kufanya majaribio ya mitihani mbalimbali ya upimaji.

Hata hivyo, Mwl. Kayombo ameongeza kuwa kikao hicho pia kitafanya tathmini ya mwenendo wa usimamizi na utekelezaji wa miradi ya miundombinu ya shule hasa Mabweni na Madarasa kwenye shule zinazotarajia kupokea wanafunzi wa Kidato cha tano 2025.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu