WATUMISHI HODARI 2025 KUTOKA OFISI YA MKUU WA MKOA WA DODOMA WAPONGEZWA

Imetumwa : May 9th, 2025

Na. Hellen M. Minja

       Habari – DODOMA RS

Watumishi Hodari kutoka Ofisi ya Mkuu wa Mkoa wa Dodoma, wamepongezwa kwa kujitoa na kujituma kufanikisha shughuli mbalimbali za Mkoa huu hali iliyosababisha wachaguliwe kuwawakilisha wengine kwenye zawadi za wafanyakazi hodari wakati wa sherehe za Mei Mosi 2025 zilizofanyika Kitaifa Mkoani Singida.

Pongezi hizo zimetolewa Mei 09, 2025 na Mkuu wa Mkoa huyo Mhe. Rosemary Senyamule alipozungumza kwa njia ya simu na Watumishi hao kwenye hafla fupi ya chakula cha pamoja iliyoambatana na kuwapongeza Watumishi Hodari akiwemo Mtumishi Hodari  wa jumla Mhandisi David Chitemo.

“Tumezifanya shughuli zile kwa ushirikiano mkubwa na najua watumishi walikua tayari. Pia nawapongeza wale wenzetu waliotuwakilisha kwa kupata zawadi za kuwa wafanyakazi hodari,ambapo pamoja na zawadi zile, niliagiza leo tufanye shughuli maalum ya kuwapongeza na kuwakabidhi zawadi zetu.” Mhe. Senyamule.

Aidha, Katibu Tawala Mkoa wa Dodoma Bw. Kaspar K. Mmuya ametumia jukwaa hilo kuwahimiza Watumishi wake kuwekeza kwenye kilimo cha matunda ya Matufaha ‘Apples’ ambacho kinaonekana kitafanya vizuri katika Mkoa wa Dodoma na soko lake ni kubwa.

“Uzuri wa ‘apples’, baada ya kuvuna inaanza tena, yaani inazaa ‘continuously’. Mkuu wa Mkoa alikwenda akapiga picha, tumeona ‘apples’ ambazo zilivunwa na ukiziona huwezi kuamini kama ni za Dodoma, unaweza kufikiri zimetoka South Afrika. Sasa tunakwenda kuhamasisha hili jambo na tunasikia zinapatikana Iringa, na mche ni shilingi 12,000 tu”.

Akitaja vigezo na sifa za kuchaguliwa kuwa Mfanyakazi hodari wa mwaka, Katibu Tawala Msaidizi Seksheni ya Utawala na Usimamizi wa  Rasilimali watu Mkoa wa Dodoma Bi. Coletha Kiwale;

“Baadhi ya vigezo vya kupata Mfanyakazi hodari ni yule ambaye sio malalamishi, anayeweza kupokea ushauri kutoka kwa Watumishi wengine, Mfanyakazi ambaye ni mbunifu lakini ambaye pia anatekeleza majukumu yake kwa kuzingatia sheria, kanuni na taratibu lakini pia anaweza kupokea ushauri kutoka kwa Watumishi wengine.”

Watumishi Hodari 2025 waliopongezwa ni Mhandisi David Chitemo (Seksheni ya Uchumi na Uzalishaji), Bi. Grace Moshi (Kitengo cha TEHAMA), Bi. Vaileth Nanyaro (Seksheni ya Usimamizi, Ufuatiliaji na Ukaguzi), Bw. Jacob Mang’ombe (Seksheni ya Utumishi), Bw. Moses Kawage (Ukaguzi wa ndani), Bi. Salma Kilili (Seksheni ya Elimu), Dr. Peres Lukango (Seksheni ya Afya) na Mhandisi Ismail Kilima (Seksheni ya Miundombinu).

#dodomafahariyawatanzania

#wekezadodomastawishadodoma

#keroyakowajibuwangu