WEZI WA MIUNDOMBINU YA SERIKALI KUSHTAKIWA KAMA WAHUJUMU UCHUMI

Imetumwa : September 19th, 2025

Na. Hellen M. Minja

       Habari – DODOMA RS

Mkuu wa Mkoa wa Dodoma Mhe. Rosemary Senyamule ametoa onyo kwa wananchi wasio waaminifu wanaohujumu miundombinu ya Serikali kuwa pindi watakapokamatwa, watachukuliwa hatua kali za kisheria kwa kufunguliwa kesi ya uhujumu uchumi.

Ameyasema hayo leo Septemba 19, 2025 alipokua akikagua maeneo ya katikati ya Jiji la Dodoma ambayo yameathirika na wizi wa mifuniko ya chemba za majitaka hali inayohatarisha usalama kwa watumiaji wa barabara pamoja na vyombo vya moto katika maeneo hayo kutoka na mashimo hayo kubaki wazi.

“Sisi Mkoa tumesikitishwa na jambo hili na tunaahidi watu hawa wataendelea kutafutwa kwa hatua zaidi na yeyote atakayeshikwa, atashtakiwa kwa kosa la Uhujumu Uchumi. Pia kuna baadhi ya maeneo tunasikia wanaiba nguzo za umeme za chuma, nitoe maelekezo kwa Wenyeviti wa Mitaa, Kata na Vitongoji waweke utaratibu maalum kwenye mitaa yao kuhakikisha mali hizi zinalindwa”. Mhe. Senyamule.

Mhe. Senyamule ameongeza kuwa, Mkoa utaunda timu ya Wataalam watakaofanya doria usiku na mchana kwenye mitaa mbalimbali ili kuwabaini na kuwakamata wezi wa miundombinu ya Serikali hivyo anatamani kila mwananchi awe mstari wa mbele kulinda mali hizo kwani Serikali imewekeza maendeleo makubwa kwa ajili yao.

Aidha, Mkurugenzi wa Mamlaka ya Maji safi na Usafi wa Mazingira Mkoa wa Dodoma Mhandisi Aron Joseph ametaja changamoto hiyo kuigharimu Serikali kwani mpaka sasa mifuniko iliyoibiwa ni 61 ikiwa na thamani ya Shilingi Milioni 91 ambapo wanaoiiba huiuza kama vyuma chakavu.

Hata hivyo, Mhe. Senyamule ametoa wito kwa wananchi wanaotumia mashimo hayo kutupa takataka, kuacha mara moja kwani wanasababisha mashimo kujaa, kuziba njia ya maji taka na hatimaye kusambaa barabarani hali inayosababisha uchafuzi wa mazingira sambamba na magonjwa ya milipuko.

#dodomafahariyawatanzania

#wekezadodomastawishadodoma

#keroyakowajibuwangu