WILAYA ZA KONGWA NA MPWAPWA KUNUFAIKA NA UFADHILI WA KOFIH

Imetumwa : February 4th, 2025

Na; Happiness E. Chindiye

Habari - Dodoma RS

Katibu Tawala Mkoa wa Dodoma Bw. Kaspar Mmuya, leo Februari 04, 2025 ameongoza kikao cha Kamati ya Usimamizi wa Mradi wa kuboresha huduma za Afya ya Uzazi na Mtoto unaofadhiliwa na Shirika la ‘ Korea Foundation International Health care' (KOFIH) Kilichofanyika kwenye ukumbi wa Hospital ya Wilaya ya Kongwa.

Kikao hicho kimelenga kujadili na kuweka mikakati mbalimbali ya utekelezaji wa shughuli za Mradi huo ambao unatekelezwa katika Halmashauri za Wilaya za Kongwa na Mpwapwa.

Akizungumza na Kamati hiyo Bw. Mmuya amesisitiza kuhusu kusimamiwa kwa mikakati ya kupunguza vifo vya watoto wachanga  na vifo vitokanavyo na uzazi kwani Mradi una lengo hilo.

"Kwa sasa nendeni mkahakikishe vifo havitokei,sitohitaji kusikia hii changamoto"

Naye Mwakilishi   wa Shirika la KOFIH Nchini Tanzania Bw. Gyeonbae Seo, ameishukuru Serikali Kuu na Uongozi wa Mkoa wa Dodoma  kwa kuendelea kushirikiana nao katika utekelezaji wa mradi huo ambao hadi sasa upo mwaka wa nne (4)  wa utekelezaji wake.

Kwa upande wake, Mratibu wa Huduma za Afya ya Uzazi  na Mtoto Mkoa wa Dodoma Bi. Nice Moshi, amesema Mkoa umepokea kiasi cha  fedha shilingi  1,550,466,939.92 kutoka KOFIH kwa ajili ya utekelezaji wa shughuli zilizopangwa mwaka 2024/2025 ambazo zimetumika kwa ujenzi wa jengo la maabara, jengo la utoaji huduma za afya ya uzazi na Mtoto, jengo la huduma za  watoto, ununuzi wa majenereta, dawa, vifaa tiba pamoja na kutoa mafunzo kwa watoa huduma za afya katika Halmashauri hizo.

Mradi huo ambao ni wa miaka mitano (2021 -2026), umefikia mwaka  wa nne (2024/2025) wa utekelezaji  tangu kuanza kwake.

#dodomafahariyawatanzania

#keroyakowajibuwangu

#birthdayangumtiwangu